Pagpamusil sa pardo drug related - Tumulak

CEBU, Philippines - Usa ang patay samtang duha ang samaran human sila gipamusil sa upat ka armadong mga tawo samtang nag-inom ug nagduwa og hantak kagahapon ala-una pasado sa kaadlawon sa sitio Villa San Pedro 2 sa barangay Basak-Pardo siyudad sa Sugbu.

Dead on the spot si Rolando Largo, 36, temporaryong nagpuyo sa Coaco Compound Villa San Pedro Uno Basak-Pardo kinsa nahiagom og samad pinusilan sa nagkadaiyang bahin sa kalawasan.

Samtang ang duha nga samaran mao sila si Ramon Selori Padriga Jr., 41, ug Joseph Jumawan, 43.

Nailhan hinuon sa kapulisan ang mga suspetsado nga sila si Nomer Billones Alyas ‘Bebot’, 58, iyang anak nga si Noliedan Billones, 22, nagpuyo sa sitio Sinulog sa barangay Mabolo, Rolando Logroño ,27, taga Villagonzalo II, sa barangay Tejero, Roel Gingoyon, 27, taga Villagonzalo II, ug Merlina Basnillo, 42, kapuyo ni Nomer.

Sa pasiunang imbestigasyon ni SPO4 Rey Cuyos nagbutyag nga sila si Largo ug Padriga Jr., naghantak kilid sa basketball court samtang si Jumawan nag-inom diha ra sab sa duol sa gihantakan dihang nangabot ang mga suspek ug kalit girakrakan si Padriga. Apan si Largo maoy na-antimano samtang si Padriga Jr., nahiagom og samad pinusilan sa tiyan ug duha ka paa, ug naigo usab sa walang bahin sa lawas si Jumawan ug daling gidala ngadto sa Cebu City Medical Center (CCMC).

Human sa pagpamusil ang mga suspetsado daling nanagan ug misakay sa nagpaabot nga RP Taxi nagtangag sa plakang GVN-829 nga gimaneho ni Danilo Zamora diin si Basnillo diha ra sulod sa maong taxi. Apan gidemalas nga adunay checkpoint sa kapulisan pinangulohan ni Insp. William Alicaba diha sa barangay Punta Princesa diin sila milusot sa ilang pag-ikyas.

Tungod kay overloaded gipahunong sila sa mga polis apan nabantayan silang nag-iyahay og tago sa ilang dala nga armas ilawom sa lingkoranan hinungdan nga sila gidakop.

Dangtan pila ka minutos nakadawat og impormasyon ang kapolisan nga ang mga sakay sa taksi ang suspek sa pagpangrakrak diha sa Basak-Pardo. Nakuha sa kapulisan ang usa ka .45 Colt pistol nga dunay magazine ug usa ka buhing bala, homemade 5.56 cal. revolver (Frontier) nga dunay tulo ka buhing bala ug duha ka empty shells sa tambor niini, laing usa ka .22 caliber magnum revolver nga dunay tulo ka buhi ug tulo ka empty shells sulod sa tambor niini ug ingon man pinaketeng gituohang shabu.

Si Nomer nakuhaan og napulo ka pakete, lima kang Merlina ug unom usab ka pakete sa shabu ang nakuha sa posisyon nila ni Noliedan, Logroño ug Gingoyon.

Si Kapitan Dave Tumulak sa Basak-Pardo mitug-an nga dunay kalambigitan sa ginadiling drugas ang pagpamusil tungod kay sila si Largo ug Padriga maoy iyang gitahasan nga maniid sa mga durugista diha sa iyang barangay ug kanunay nga mohatag kaniya og impormasyon.  - BANAT NEWS