CEBU, Philippines - Ang kabaybayonan sa dakbayan sa Talisay gidugok sa mga nangaligo kagahapon sa pagsaulog sa Easter Sunday.
Si Eve Larawan nga tag-iya sa Larawan Beach Resort sa pakighinabi sa Banat News nagkanayon nga alas 9:00 pa sa buntag kagahapon ukopado na ang ilang mga lamesa ug cottage ug gani daghan pa ang nangabot nga gustong moabang og mga cottage ug lamesa apan wala na silay nahatag ug gilauman nga hangtud sa hapon daghan pa ang nangabot nga mangaligo.
Matud niya nga kasagarang nangaligo taga dakbayan sa Sugbo.
Matag lamesa P150 ang ilang paabang ug P500 sa cottage, apan kagahapon makita nga wala nay maabangang lamesa ug cottage hinungdan nga nangyaka na lang ang uban sa baybayon, ug bisan ang ilang pagkaon giladlad nalang sa baybayon.
Sa pagsuwat ning balita, si Larawan nagkanayon nga malinawon kaayo ang ilang baybayon ug naandan na matag adlaw nga malinawon ra kaayo ang Larawan Beach Resort. Matag Easter Sunday ang Larawan Beach dugokon gyud sa mga maligo tungod kay wala may entrance fee ang maligo sa maong resort.
Sa laing bahin, si Senior Inspector Errol Francis Deveyra, officer-in-charge sa Talisay City Police Station nagkanayon nga ang kabaybayonan sa Talisay gibutangan niya kini og mga polis nga nag-roving aron mamentenar ang kahapsay ug kalinaw.
Hinuon nanghinaot si Deveyra nga ang mga maligo magbantay usab sa ilang kaugalingon aron malikayan ang disgrasya ug dili usab sila mabiktima sa mga kiriwan.
Dili kalikayan nga ang mga badlongon o kiriwan molihok usab kay mangita og mabiktima kung dunay mga okasyon.
Matud ni Deveyra nga sayo sa buntag uban kang PO2 Narciso Alforque ug mga sakop sa Fisherman Sea and Ecological Care (FISECA) mi-roving sa kadagatan sakay sa patrol boat sa FISECA aron pagpaniid sa mga nangaligo.
Matud niya nga gawas sa mga polis ug lifeguard nga nagbantay sa kabaybayonan, ang FISECA nagbahis-bahis usab sa kadagatan aron makatabang og bantay sa mga nangaligo. (BANAT NEWS)