Kalipay, kaisog ug gugma ang panawagan ni Palma atol sa 'Pasko sa Pagkabanhaw'

CEBU, Philippines - Magmalipayon, dili mahadlok ug magmahigugmaon, kini ang gipaambit nga mensahe ni Arsobispo sa Sugbu Jose Palma sa gipahigayung Santos nga Misa alang sa kasaulogan sa “Pasko sa Pagkabanhaw” kagahapon sa buntag didto sa Cebu Metropolitan Cathedral.

Sa labing una niyang Easter Sunday Mass isip Arsobispo sa Sugbu, si Palma nagkanayon nga mahinungdanon ang pagsaulog sa mga katoliko sa pagkabanhaw ni Hesu Kristo tungod kay nagpasabot kini sa pagpalig-on sa atong pagtuo ngadto sa Kahitas-an nga nagpakamatay aron luwason ang mga sala sa kalibutan.

“Magpasalamat kita kay kung si Kristo wa nabanhaw, way kahulugan ang atong pagtuo ug sa atong pagtuo makaingun kita there are many founders of religion, daghan kaayung mga taw ug mga propeta nga naghatag ug nagpasabwag og mga maayung pulong but only Jesus died and risen,” matud pa ni Palma.

Nagkanayon usab si Palma nga isip katoliko dili unta makontento lang sa pagtuo sa pagkabanhaw, apan magsilbi usab nga tigsabwag o mensahero sa maong balaanong gipakita ni Hesu Kristo.

Aron mabuhat kini kinahanglan nga makita sa tagsa-tagsa ka mga dagway sa katoliko ang kamaya tungod sa pagkabuhi pagbalik sa Ginoo.

Ikaduha mao ang dili pagpakita sa kahadlok bisan pa sa mga nahitabong kagubot ug kalisdanan sa kinabuhi ug ang ikatulo ug katapusan mao ang pagpakita sa panaghigugmaay dili lang sa panahon sa semana santa apan lakip na sa mga ordinaryong adlaw.

“Ang atong gugma dili lang unta kutob sa rites, apan apil na sa atong life and may we go home and practice ang atong pagka-kristiyano ug unta sa atong pagbag-o sa atong pagtuo, sa atong pagbag-o sa atong pasalamat, mag-ampo kita nga mahisama sa mga taw nga iyang gipakitaan sa iyang pagkabanhaw,” dugang pa ni Palma. (BANAT NEWS)