CEBU, Philippines - Gibati og kaguol si Cebu Archbishop Jose Palma ngadto ni Presidente Benigno “Noynoy” Aquino III sa wala niini pagtuon og maayo sa baruganan sa simbahan batok sa kontrobersyal nga Reproductive Health (RH) Bill.
“I am sad for him, he should have think and evaluate on the Church’s stand on the bill. He relies so much on the actions of the people around him”, matud pa ni Palma.
Nasayran nga si Aquino mipagawas og statement nga andam siya silotan sa Simbahan pinaagi sa excommunication aron lang mapasar ang kontrobersyal bill aron mamahimong balaod.
Ang maong kontrobersyal nga bill matud pa sa mga magbabalaod dako og papel aron matabangan ang mga kababayen-an pinaagi sa maayong pagplano sa pamilya, dugang napanglantawang makabenipisyo niini mao ang mga kabus nga pamilya ug ang kinabuk-an sa ekonomiya sa nasud.
Usa sa gihimong argumento sa mga magbabalaod ug sa mga pro-RH Bills miingon nga pulos ‘tuo-tuo’ lang ug walay siyentipikong sukaranan ang baruganan sa Simbahan batok sa maong balaudnon.
Samtang ang katuyoan sa RH Bill gawas sa nahisgutang mga benepisyo makatabang kini sa paglambo sa ekonomiya, hustong edukasyon sa mga kabus nga kabataan, ug uban pa tungod kay dili mosirit og saka ang populasyon sa Pilipinas.
Kabahin sa pamahayag ni Aquino, si Palma mipasabot nga ang excommunication dili nila gamiton aron lang makakuha og suporta.
“We are only here to teach according to the mind of Jesus. It is far from the mind of the Church to excommunicate anybody,” pasabot pa ni Palma
Samtang i-ampo usab ni Palma si Aquino nga unta tan-awon una sa presidente ang iyang baruganan ug makakuha og saktong desisyon.
Sa milabay’ng semana, si Aquino mibutyag nga hugot na gyud ang iyang desisyon nga ipasa ang RH Bill nga karun gikatawag nga Responsible Parenthood Bill bisan paman sa hugot nga pagsupak sa Katolikong Simbahan ug ubang sektor batok niini.
Samtang si Catholic Bishops Conference(CBCP) president Tandag Bishop Nereo Odchimar sa iyang Easter Sunday message nagkanayon nga kinahanglang isipong simbolo ang pagkabanhaw ni Kristo nga walay katapusang kinabuhi.
Nanawagan sa publiko ang CBCP nga dili kuhaan og katungod ang uban aron mabuhi. (BANAT NEWS)