CEBU, Philippines - Duha ka tawo ang namatay sa nahitabong disgrasya niadtong Biyernes Santo sa gabii samtang tulo usab niini ang samaran human makaligis og liba-ong ang ilang gisakyang motorsiklo ug nalahos og kasungag sa gikasugat nga traysikol pasado alas- 6 sa gabii sa barangay Pajo lungsod sa Daanbantayan.
Ang namatay mao sila si Aldrin Salatandra, 23, taga barangay Malingin nga dead on arrival sa tambalanan ug Marvin Inso, nga namatay ra usab human sa pipila ka minutos ang nakalabay ug molupyo sa sitio Tambis sa mao gihapong barangay.
Samtang ang samaran mao silang Alvin Salatandra, 28, Elisio Rodrigo Pepito, 31 ug ang tricycle driver nga si Tepanis Pepito.
Sa imbestigasyon sa kapolisan sa lungsod sa Daanbantayan nasayran nga ang motorsiklong gisakyan sa upat ka biktima gimaneho ni Inso gikan sa barangay Poblacion patubang sa barangay Pajo.
Matud pa ang mga nakalas giingong nakaligis og lawom nga liba-ong ug tungod kay upat silang nagsakay ug kusog usab ang padagan ni Inso nawad-an kini og control sa manobela ug nasarasay.
Diha-diha nasampak sila sa gikasugat nga traysikol nga gimaneho usab ni Pepito. Tungod sa kakusog sa pagkabangga nangalagpot ang biktima.
Ang mga biktima daling gidala sa Daanbantayan District Hospital apan si Salatandra gideklarar kini nga dead on arrival samtang si Inso namatay ra usab human sa pipila ka oras niini.
Matud pa ni PO2 Steve Buoc sa Daanbantayan Police Station, nga tungod lang sa lalom nga liba-ong maoy hinungdan sa maong disgrasya ug ingon man ang overloading.
Nasuta usab nga hubog ang mga biktima atol sa maong panghitabo. (BANAT NEWS)