Gipatay tungod sa selos

CEBU, Philippines - Patay ang usa ka babaye human kini gidunggab sa giingong kanhi hinigugma pasado alas-5 sa miaging hapon sa sitio Kalubihan barangay San Nicolas ning dakbayan gumikan sa selos.

Ang namatay nailhan nga si Jocelyn Añora, 29, molupyo sa maong lugar samtang ang gitumbok nga reponsable sa iyang kamatayon mao ang kanhi hinigugma nga si Henry Cabalda, taga barangay Pasil.

Sa imbestigasyon sa kapolisan nahitabo ang pagpatay diha sa giabangan niining silong sa usa ka panimalay base sa pamahayag sa mga nag-abang sa ikaduhang andana nga sila si Carlo Magsipoc, 24, Neil Toledo, 35 ug Teresita Rostauro, 26.

Ang mga saksi mibutyag nga nakadungog sila sa pagsiyagit sa biktima gikan sa kwarto niini hinungdan nga ilaha kining gisusi ug ilang naabtan nga nagkadugo na kini nga naghinay-hinay og kamang sa salog.

Matud pa nila nga yano rang migawas sa lawak sa biktima ang suspek ug milakaw palayo nga nagbitbit pa og nagkadugong kutsilyo.

Ang tulo ka okupante daling midala sa biktima sa Cebu City Medical Center human makaangkon og samad dinunggaban dapit sa iyang ilok apan pipila ka minutos ang milabay namatay kini.

Matud pa ni SPO4 Alex Dacua sa Homicide Section, sa Cebu City Police Office, nga base sa ilang nakuhang impormasyon, ang suspetsado magbisitahan sa panimalay sa biktima sulod na sa usa ka bulan.

Nasayran usab ni Dacua nga kanhi hinigugma sa biktima ang suspetsado apan ila pa usab kini nga sutaon ang maong taho.

Ang biktima kasamtangan nga adunay kapuyo nga posibleng maoy hinungdan sa pagpanunggab sa suspetsado.

Ang angulo nga love-triangle maoy kasamtangan nga gisubay karun sa kapolisan sa maong krimen. (BANAT NEWS)