Buhing Kalbaryo malampuson, Sugat karong adlawa gipaabot

CEBU, Philippines - Nagmalamapuson ang nagkadaiyang relihiyosong kalihokan sa   Buhing Kalbaryo niadtong Biyernes Santo dinhi sa dakbayan sa Sugbo.

Gihimo ang buhing paghulagway sa pasyon ug kamatayon ni Hesu Kristo diin kapin usa ka gatos ka mga kabatan-onan gikan sa Barangay San Nicolas Proper, Calamba ug Guadalupe ang misalmot niini.

Ang maong dula sa entablado nanukad sa San Nicolas Parish Church diin gisundan sa Via Cruces ug paingon na ngadto sa Parokya sa Mahal nga Birhen sa Guadalupe.

Ang anak ni Mayor Michael Rama nga si Mikel maoy midala isip Herodes. Gikonsiderar sa siyudad nga tourist attraction ang maong kalihukan gumikan kay kanunay kini nga dagsaon sa mga turista.

Samtang si Sangguniang Kabataan Federation (SKF) Cebu City Chapter president John Philip Po II sa mga kabatan-onan nga misalmot sa mga kalihukan sa Semana Santa nagkanayon nga mahinungdanon kini alang sa kabatan-onan.

Sumala pa ni Po nga usa kini ka pamaagi nga mapabilin ang pagpreserbar sa mga relihiyosong kalihukan nga mao na’y naandan sa kadaghanan sukad pa kaniadto.

Lakip sa giobserbar sa mga Romano Katoliko mao ang nagkadaiyang kalihukan kini sama sa via cruces nga gihimo sa nagkadaiyang simbahan, Bisita Iglesia sa mga simbahan nga diin ang tibuok mga pamilya nag-uban nga nanglakaw pagbisita kutob sa ilang mahimo sa tanang simbahan sa ilang mga lugar.

Karong adlawa usab gipaabot nga maanindot nga nagkadaiyang selebrasyon sa “Sugat” nga mao ang paghimo og dula sa pagkabanhaw sa Ginoong Hesus nga pagabuhaton sa tanang mga simbahang Katoliko.

Lakip na niini ang nabantog nga Sugat sa lungsod sa Minglanilla ug uban pa. (BANAT NEWS)