ALU-TUCP nangayo'g P100 nga umento

CEBU, Philippines - Ang Associated Labor Union-Trade Union Congress of the Philippines (ALU-TUCP) miduso og petisyon ngadto sa Department of Labor and Employment (DOLE) alang sa P100 nga usbaw sa suholan matag adlaw sa Central Visayas Region.

Ang ALU mipasabot nga niadtong Hunyo, 1989 ang Kongreso mipasar sa Wage Rationalization Act (R.A. 6727) nga nagmando sa Regional Tripartite Wages and Productivity Board (RTWPB) sa pagtuman ning maong usbaw.

Ang RA 6727 mitugot sa P25 nga usbaw sa suholan diin nahimong P89 ang minimum nga suholan sa national non-agricultural matag adlaw.

Ang Board miluwat og mga wage order diin ang duha ka ulahing wage order mao ang P17 nga usbaw ubos sa W.O. R.O. VII-14 niadtong Mayo 22, 2008 ug P18 nga usbaw sa basic wage sa tanang minimum wage earners o mga nagdawat og minimum nga suholan sa mga pribadong sektor ubos sa order RO VII-15 niadtong Agosto 12, 2010.

Nasuta sa ALU nga ang nasud nakabangon na gikan sa krisis ug kinahanglan usab nga hunahunaon aron nga ang mga mamumuo makabangon usab gikan sa kalisud.

Niining padayong pagsaka sa presyo sa mga nag-unang palaliton, mga produkto sa petrolyo, plitehan ug mga serbisyo, ang suholan sa mga mamumuo dili kini kapaigo.

 Sa tunga-tunga niadtong Mayo 2008 ug Marso 2011ang Consumer Price Index (CPI) sa rehiyon misaka gikan sa 160.0 ngadto sa 177.8 o 11 porsyento.

Ang 11 porsiyentong usbaw sa consumer prices kinahanglang tugbangan usab og usbaw nga P29.50 ang adlaw sa suholan diin karon nahimong P267 ang minimum nga suholan.

Sa kahimtang karon sa presyo sa lana, gituohan nga sa tunga-tunga sa Abril ug Disyembre 2011 mosaka na usab ang bayranan sa suga ug tubig ngadto sa 10 porsiyento.

Nagkinahanglan og usbaw nga P26.70 diin gi-round off kini ngadto sa P26.50 ang suholan sa mga mamumuo ning maong kahimtang.

Nasuta usab sa ALU nga wala mouswag sa milabay’ng dekada ang standard of living sa mga mamumuo samtang ang ubang mga sektor nakapahimulos og sobrang mga income ug katigayonan.

Matud sa ALU nga P385 ang angayang minimum nga suholan sa tuig 2011.

Ang minimum nga suholan matag adlaw karon sa Central Visayas Region P285 ra.

Matud sa ALU nga makiangayon alang sa agricultural ug non-agricultural nga sektor sa mga mamumuo dinhi sa Central Visayas nga usbawan ngadto sa P100 ang ilang suholan. (BANAT NEWS)