Carbon market kinahanglang butanga'g parking space

CEBU, Philippines - Naglaraw si Cebu City Assistant Administrator for Economic Enterprise Dominic Diño nga pabutangan puhon og parking space ang Carbon Market Complex isip usa sa instrumento sa pagpalambo sa nahisgutang merkado. Mao kini ang napanglantawan ni Diño human sa gihimo niyang pagpaniid kauban ang mga kawani sa market authority ning dakbayan sa Sugbo sa tulo ka mga siyudad sa Luzon.

Nasayran nga mibisita dili palang dugay si Diño uban nila ni Market Administrator Racquel Arce ug ang lima ka mga market supervisor didto sa siyudad sa Batangas, Marikina ug Pasay aron sa pag-obserbar sa nahisgutang mga Local Government Unit sa ilang pamaagi sa pagdumala sa ilang merkado nga mahimong sundon sa siyudad sa Sugbo.

Usa sa ilang nasuta nga labing makapadas-og sa kinitaan sa merkado mao ang parking area nga kaparkingan sa mga sakyanan sa mga mangomprang kuwartahan.

 Ang maong paagi makatabang usab sa pagpaluag sa dagan sa trapiko   sa Carbon. Dugang pa niya nga dili usab mahasol ang mga mangumprahay kung adunay parking space sanglit duna man sila’y luwas ug tukmang lugar nga kabutangan sa ilang mga sakyanan. (BANAT NEWS)