Giulo pagpusil namatay

CEBU, Philippines - Namatay ang usa ka tawo nga giulo pagpusil sa iyang silingan sa sitio San Jose sa barangay Maguikay, dakbayan sa Mandaue niadtong Biyernes Santo alas 4:00 pasado sa hapon.

Ang biktima mao si Edgar Lindayao, 32, minyo, nga nagpuyo sa maong dapit samtang ang suspetsadong mipatay kaniya mao si Jose Aninon Jr., alias Jun Pagao, hingkod, ug silingan sa biktima.

Si Rosalie Arcenal, 35, laing silingan sa biktima kinsa maoy nakasaksi sa maong pagpamusil mitug-an nga nagkaabot lang sa maong dapit ang biktima ug suspetsado. Dugang pa niya nga nagkalalis ang duha ug taliwala sa maong panaglalis, ang suspetsado nga wala makapugong sa kapungot, kalit lang namusil sa biktima. Matud pa nila ni PO2 Arnel Mendoza nga human sa maong pagpamusil ang suspetsado dali usab nga nakasibat pahilayo sa maong dapit ug gipangita kini karon sa mga polis. 

Si SPO2 Abatayo miingon nga ang biktima nasabak sa tuo niyang abaga ug maoy iyang namatyan. Padayong gipangita pa sa kapolisan ang suspetsado. (WC) (BANAT NEWS)