Lungsod sa San Francisco gipasidunggan sa UN

CEBU, Philippines - Naangkon sa lungsod sa San Francisco, isla sa Camotes ang 2011 United Nations Sasakawa Awards for Disaster Reduction. Ganti nga $50,000 ang madawat sa lungsod alang sa gigasto niini sa pagpananom og duha ka milyon ka kahoy aron pagpanalipod sa lungsod batok sa lunop ug baha ug ubang proyekto.

Ang Sasakawa nagpasabot sa dakong kalampusan sa usa ka lugar nga maghatag usab og inspirasyon sa uban sumala pa sa UN Environment Programme (UNEP) nga maoy naghatag sa premyo. Ang lungsod sa San Francisco nahimo na nga modelo sa kalibutanong kampanya sa Disaster Risk Reduction nga gipasiugdahan sa UN International Strategy for Disaster Reduction sa niaging tuig.

Nunot niini, gipahalipayan ni Senador Loren Legarda ang lokal nga kagamhanan pinaagi ni Mayor Ally Arquilliano ug Bise-Mayor Alfredo Arquillano Jr. gumikan sa maong kadaugan.

Si Legarda mao usab ang UNISDR Regional Champion for Disaster Risk Reduction and Climate Change Adaptation for Asia-Pacific.

“I am deeply inspired by the municipality of San Francisco’s pioneering initiatives on environmental protection, disaster risk reduction and climate change adaptation,” matud pa ni Legarda. (BANAT NEWS)