Espanyol nga nag-big bike misaliring nakalas

CEBU, Philippines - Patay ang usa ka Espanyol samtang grabe ang kahimtang sa usa ka lalaki human ang duha nakasugat og aksidente sa kadalanan sa managlahing lugar kagahapon. Kagahapon pasado alas-4 sa kaadlawon namatay si Pedro Andres, 47, kinsa usa ka Spanish national nga balikbayan nga taga barangay Valladolid human kini mabangga sa railings sa barangay Perelos sa dakbayan sa Carcar samtang nagmaneho sa iyang big bike nga motorsiklo.

Sa pakighinabi sa Banat News ni SPO1 Meliton Agadier sa Carcar Police, gikan sa barangay Sangat sa lungsod sa San Fernando si Andres padulong na pauli apan pag-abot sa nahisgutang lugar natumba ang gimaneho niining big bike.

Tungod sa kakusog sa dagan naguroy kini sa iyang motorsiklong mibagnos sa dalan ug nabanggaan ang nag-unang multicab nga gimaneho ni Arnold Antopina.Pagkahuman niini nabunal ang biktima sa railings sa dalan nga nakaingon sa grabeng kadaot sa iyang ulo ug kalawasan. Si Andres gidala sa Carcar District Hospital apan gideklarar kini nga dead on arrival.

Samtang wala pa usab masayri sa kapolisan kun unsa ang hinungdan sa pagkatumba sa big bike sa biktima kun nakatulog ba kini o naka-inom samtang nagmaneho. (BANAT NEWS)