31 anyos nga lalaki gitulis ug gipatay

CEBU, Philippines - Patay ang usa ka tawo human kini pusila sa mga tulisan nga mitulis kaniya   didto sa Vistamar Subdivision sa sitio Soong, barangay Mactan, dakbayan sa Lapulapu sa miaging gabii.

Ang biktima mao si Junygen Cabuyao Lumapis, 31, minyo, ug nagtrabaho isip maintenance worker sa Cebu Pranas and Spa sa sitio Abuno, Pajac, dakbayan sa Lapulapu.

Si SPO3 Jesus Gemenia sa homicide section sa kapolisan sa maong dakbayan nga nahinabi sa Banat News miingon nga nagsakay sa iyang motorsiklo ang biktima kauban si Marites Bagundol, 28 , dalaga nga taga barangay Punta Ingano sa maong dakbayan, kinsa kauban niya sa trabaho.

Matud ni SPO3 Gemenia nga samtang nagdagan sila, mihangyo si Bagundol nga mangihi sa pag-abot nila sa awaaw nga lugar sa Vistamar subdivision.

Samtang miyaka sa kasagbutan si Bagundol sa pagpangihi, nagpabilin sa iyang motorsiklo ang biktima nga nag-inusara.

Dihang kalit lang mihunong sa iyang atubangan ang usa ka motorsiklo nga giluwanan sa tulo ka wala hiilhing mga tawo kinsa usa kanila ang mition og armas de fuego sa biktima ug mideklarar nga tulis.

Si Bagundol miasoy sa kapolisan nga wala siya makahuman og pangihi dihang nabati niya ang singgit sa biktima nga nagkanayon “ayaw bay” dayong hunat og dagan niini apan gipusil kini sa makadaghan hangtod nga nahagba sa yuta.

Nasabak sa dughan ug uban pang bahin sa lawas ang biktima nga maoy hinungdan sa hinanaling kamatayon niini.

Samtang dihang nakita sa mga tulisan si Bagundol, gitionan usab siya og armas apan nagpakiluoy siya ug gihatag ang iyang bag nga may sulod nga P600 ug usa ka cell phone.

Si SPO3 Gemenia miingon nga human ikatunol ni Bagundol ang iyang bag, nagdali sa pagbalik og sakay ang tulo ka tulisan sa gi-parking nilang motorsiklo ug gidala pa ang yawe sa motorsiklo ni Lumapis sa pagsibat niini pahilayo sa maong dapit.

Gipangita na karon sa kapolisan ang maong mga tulisan. - BANAT NEWS