CEBU, Philippines - Ang kagamhanan pinaagi sa Department of Agriculture (DA)7 dinhi sa Central Visayas naningkamot nga kahatagan og dugang kasayoran bahin sa hustong paagi sa pagpamuhi og kahayopan ang mga molupyo aron ikasagang sa nagtubo nga panginahanglan sa pagkaon karon ug sa umaabot.
Busa gilusad karon ang ilang programa nga Free Livestock and Poultry Raising Seminar pinaagi sa pagpanguna ni Regional Executive Director Leo P. Caneda nga ipahigayon sa ilang buhatang rehiyonal nga nahimutang sa conference room sa KRC Building, barangay Subangdaku, dakbayan sa Mandaue.
Ang sector coordinator sa livestock and poultry sector Joel Elumba sa DA7 nagkanayon nga ang seminar karong Abril 28, 2011 ala-1:00 hangtod alas 5:00 sa hapon ipunting sa pag-andam sa mga tanom nga makaon sa mga kanding ug baka ug ang pag-atiman sa mga kahayopan aron di kaayo maluya sa sakit.
Kadugtong kining maong hilisgutanan sa seminar bahin sa pagbuhi og kanding nga gihimo niadtong Abril 14, 2011.
Sa maong higayon gitudlo ngadto sa mga nanambong ang bahin sa pagpili sa maayong baye ug laki nga kanding ug ang pagtukod sa balay alang niini.
Si Elumba nagkanayon nga sa umaabot nga Mayo, ang iseminar mao na usab ang bahin sa pagpamuhi og baka, baboy ug manok.
Matud pa ni Elumba nga ang tuyo sa kagamhanan, mao nga kun makakat-on ang katawhan sa pagpamuhi og hayop dako kaayo kini og ikatabang kanila dili lamang sa ilang pagkaon, balay, panglawas, apan ingon man sa pagpa-edukar sa ilang mga anak. - BANAT NEWS