Drayber sa taksi mihasi sa reporter

CEBU, Philippines - Nag-atubang kagahapon sa buhatan sa Land Transportation Office-7 ang tigbalita sa Banat News ug ang taksi drayber nga iyang gireklamong mihasi kaniya niadtong Lunes diha sa dalan Osmeña Blvd. ning dakbayan.

Ang taxi driver nga gireklamo mao si Ernesto Polvo, 51, molupyo sa barangay Labangon ug nagmaneho nga JTY Taxi nga adunay plakang VEC-927 gireklmao sa senior reporter ning pamantalaan nga si Brenda Batuto.

Si Batuto sa iyang reklamo mibutyag nga padulong siya sa Central Command aron unta duawon ang anak nga nag-training sa maong kampo. Matud pa niya nga aduna siya’y unang gipara nga taksi diha sa may eskina sa Manalili ug Osmeña Blvd. apan dunay sulod maong milakaw siya sa unahan aron mag-atang.

Nianang tungura miagi si Polvo luwan sa iyang Toyota Vios nga taksi apan wala kini mapara ni Batuto sanglit midiretso man kini ug mihunong duol sa traffic lights apan gipasiplatan ni Batuto kung duna ba kini sakay ug nasuta niyang wala kini pasahero.

Sa pagtuong dili kini magpasakay mipara siya og laing taksi ug iyang napara ang AYE Taxi nga may plakang GXM-484 ug maoy iyang gisakyan.

Mao nalay kakugang ni Batuto dihang diha na siya sa sulod sa taksi miatras si Polvo ug mitupad sa ilang taksi bisan paman og ‘go’ na ang signal ug sa ilang pag-abante misunod kini ug dihang nakaapas giablihan ni Polvo ang iyang bintana ug nagpunay og tutok sa reporter.

Wala panumbalinga ni Batuto si Polvo apan pag-abot duol sa may eskina sa Sanciangko ug Osmeña Blvd. diin stop sad ang signal mikanaog sa iyang taksi si Polvo ug gibunlot ang pultahan sa gisakyang taksi sa reporter apan naka-lock kini.

Diha nalang nahibaw-an ni Batuto dihang gipaubos sa drayber sa gisakyan niyang taksi ang bintana, nasuko diay kini nganong wala mosakay kaniya ang maong reporter.

Sumala pa ni Batuto gihinganlan pa siya og ‘buang’ hinungdan sa kauwaw, kahadlok ug kapungot nga iyang gibati. Si Batuto mipasabot kang Polvo nga wala gyud niya kini paraha.

Dihang nag-atubang ang duha sa LTO mihimakak si Polvo apan kini miangkong iya rang gisukmatan ang tigbalita. Giangkon usab niyang gisuwayan niya ang pag-abli sa pultahan sa gisakyan ni Batuto.

Si Sherwin Jugao sa LTO nga maoy mi-imbestigar sa maong insidente mibutyag nga adunay penalty si Polvo P1,500 tungod sa iyang gibuhat nga paglapas sa “breach of condition of franchise ug discourteous.”

Gimandoan siyang mopailawom sa seminar sulod sa usa ka adlaw ug mag-agad sa direktor kung pila ka adlaw ang suspensyon nga ipahamtang batok kaniya nga dili molapas sa 30 ka adlaw.  - BANAT NEWS