Nakakita'g bikil sa disko gipamusil 1 patay, 2 angol

CEBU, Philippines - Usa ang patay samtang duha ang samaran sa tulo ka mga batan-on duha niini pulos menor de edad nga gipamusil sa duha ka batan-on nga nagsakay og motorsiklo kagahapon sa alas-4 sa kaadlawon diha sa Juana St., sa barangay Camputhaw siyudad sa Sugbu.

Patay na pag-abot sa Chong Hua Hospital mao si John Stephen Estrera, 18, naigo sa   iyang dughan nga nagpuyo sa sitio Caimitohan sa barangay Taboc siyudad sa Mandaue ug sales distributor sa usa ka kompanya.

Samtang ang duha nga nangaangol mao ang usa ka 17-anyos tinun-an sa kursong nursing sa usa ka unibersidad dinhi sa dakbayan ug laing 17-anyos, nga tinun-an usab sa usa ka aeronautical school sa dakbayan sa Lapulapu.

Sa pasiunang pakisusi sa mga sakop sa Crime Scene Investigation Unit (CSIU) ug Homicide Section pinangulohan ni PO3 Victor Ruel Ayuman duha ka basiyo sa kalibre .45 ang ilang napalgan.          

Si PO2 Jodan Batucan nga nahinabi sa Banat News sa telepono mitug-an nga sa sayo pa niana nagdisko sa Beat sa dalan Mango Avenue ang tulo ug giingong nakakita og samok ug namauli.

Apan samtang sila naglakaw sa dalan ilang nakit-an diha tungod sa National Bookstore ang usa ka Neo nga Yamaha nga nagsunod-sunod kanila nga may duha ka mga batan-ong sakay dayon misutoy palayo.

Matud ni Batucan nga sa pag-abot sa mga biktima sa Juana St., kalit silang gipamusil sa nag-angkas sa motorsiklo ug pulos nangaigo.

Ang kapulisan nagpadayon sa ilang imbestigasyon ug ilang adtuon ang diskohan sa pamasin nga makakuha sila og dugang impormasyon ug dunay makahatag kanila og deskripsiyon sa grupo sa mga batan-on nga gikalalis sa mga biktima aron ila kining mailhan ug mapasakaan og kaso.  - BANAT NEWS