Semana Santa panahon sa pamalandong

CEBU, Philippines - Subling gipahimangnuan sa Simbahan ang mga Katoliko nga ang Semana Santa panahon sa pag-ampo ug dili aron magbakasyon ug maglingaw-lingaw.

Karong adlawa mao ang opisyal nga adlaw nga walay trabaho aron mahatagan og panahon ang mga Katoliko sa pag-obserbar sa labing balaang mga adlaw sa Simbahang Katoliko.

Naalarma ang simbahan tungod kay nabatasan na sa uban nga mangaligo og dagat o mobakasyon atol sa Semana Santa imbes nga mamalandong manglaag hinuon.

 Didto sa kaulohan, sa pakighinabi sa Radio Veritas, si Batanes Bishop Camillo Gregorio nagkanayon nga obligasyon sa usa ka Kristiyano ang mga buluhaton atol sa Semana Santa. Sa habig sa Archdiocese sa Sugbu, si Episcopal Vicar Msgr. Esteban Binghay nagkanayon nga dili supak ang simbahan sa pagbakasyon ug pagpahuway, apan kinahanglan nga dili nila kalimtan ang tinuoray nga rason sa pagsaulog sa Semana Santa.

“Siyaro naman bisa’g gamay nga panahon, kinahanglan lang makamao sila mobalanse sa oras ug mangita sila og higayon alang sa ilang ispirituhanong kalambuan,” matud pa ni Binghay. Sa laing bahin, giatangan karon sa simbahan ang paghugop sa mga tawo nga mangompisal atol sa Huwebes Santo.

Apan si Binghay namahayag nga dili unta anaron sa mga katoliko nga itingob ang pagpangompisal atol sa Semana Santa tungod kay mas labing maayo kung ka usa sa usa ka buwan kini buhaton.  - BANAT NEWS