CEBU, Philippines - Si PNP Chief Raul Bacalso mipadala og mga ‘tips’ ngadto sa tanang rehiyonal nga buhatan lukop nasud alang sa katawhan aron di mabiktima atol sa kasaulogan sa Semana Santa.
Sirad-an ang tanang pultahan ug bintana, segurohon nga walay kaagian ang si bisan kinsa nga tawo nga nagplanong mosulod sa balay ug mangawat; di magbutang og timailhang way tawo sa balay, kung duol ra ang adtoan mahimong patingugon ang radio sa sulod o ba kaha magbilin gyud og tawo nga mobantay.
Samtang ang magdala og sakyanan ipasusing daan ang kondisyon niini, makina, baterya, oil, brake, ligid, suga, signal lights ug uban pa. Siguruhong kompleto ang papeles sa sakyanan; likayan ang pagmanehong usa ra ka kamot ang igunit sa manobela, i-lock ang pultahan, likayan ang pag-inom kung mo-drive, likayan ang pag-text samtang nagmaneho, ug magdala og flashlights o emergency lights.
Kadtong mag-commute, gidili ang pagsuot og mga mahalong alahas o kaha magdala og dakong kantidad, ampingan ang dala nga cellphone o kaha ubang butang nga limitadong dad-on, likayan ang pagdala og daghang gamit aron dili maglisod sa pagbiyahe ug sayon bantayan ang kabtangan, mosayo sa terminal, pantalan o tugpahanan; magbantay sa mga kawatan, sama sa salisi gang, Laglag Barya Gang ug uban pa, kinahanglan pangitaon ang Police Assistance Booths sa airports, pantalan, terminal ug kun nabiktima kamo i-report dayon kini.
Samtang palikayon ang mga bata diha sa simbahan pagduol sa wala mailhing mga tawo, pasul-ubon ang mga bata og IDs, kun mag-swimming kinahanglang siguruhong makamaong molangoy, sutaon daan asa ang first aid station ug PNP Assistance Booth alang sa emergency o police assistance. - BANAT NEWS