CEBU, Philippines - Adunay pagkunhod sa mga irong saag ug libud-suroy karong tuiga itandi sa mga nangaging tuig.
Mao kini gibutyag ni Rosalima Cimagala, Administrative Officer sa Animal Health Division sa Department of Veterinary Medicine & Fisheries (DVMF) sa Sugbo sa pakighinabi sa Philippine Information Agency (PIA).
Sa tala nga gipadala ni Cimagala sa PIA, nakita nga sa bulan sa Marso karong tuiga, adunay 36 ka mga libud-suroy nga mga iro nga gitugyan ngadto sa DVMF.
Samtang mikabat sa 120 ning mga iroa ang nadawat sa DVMF sa tuig 2010, ug 368 niadtong 2009.
Midugang si Cimagala nga sa mga iro nga gitugyan ngadto sa DVMF, 27 niini ang gipatay pinaagi sa pag-injection og ‘Euthal’ sa miaging bulan.
Ang injection nga Euthal maoy bag-ong paagi sa pagpatay sa mga iro karong panahona lahi sa gigamit nga gas chamber kaniadto nga gikondenar na karon.
Sa laing bahin mikabat sa P27 mil kapin ang kita sa DVMF sa miaging tuig gikan sa 183 ka mga iro nga giparehistro , gipabakunahan og anti-rabies, gipakapon, gipurga ug gitambalan sa mga sakit sa tag P150 matag usa nga gibayad sa mga tag-iya.
Sa tala sa Rabies Control Program, mikabat sa 2,254 ang nabakunahan og anti-rabies, 131 ang nakapon, 128 ang gi-ligate, 191 ang gipurga, ug 200 ang gitambalan sa sakit. Matud pa ni Cimagala nga libre ug walay bayad ang mga tambal nga gidapat sa mga iro. (PIA-7/JSM) (BANATNEWS)