CEBU, Philippines - Miduso si Renante Pique, amahan sa 6-anyos nga gipatay nga si Ellah Joy Pique inabagan sa abogado sa Children’s Legal Bureau (CLB) nga si Joan Dymphna Saniel og motion for partial reconsideration ngadto sa korte.
Si Renante mihangyo kang Regional Trial Court (RTC) Judge Mienrado Paredes sa Branch 13 nga i-rekonsiderar ang desisyon niini kabahin sa pagpauli sa ubang mga butang ngadto kang Bella Ruby Santos.
Ang nahisgutang mga butang giingong wala maapil sa search warrant nga giisyu ni Paredes batok kang Santos.
Ang mga butang nga buot ipabilin sa kampo ni Pique mao ang hair strands (buhok), LAN cord, duha ka bato, mga pornographic CD cover, nagkalain-laing CD ug waiver.
Matud ni Renante nga ang maong mga butang kinahanglang ipabilin sa korte tungod kay posibleng duna kini kalambigitan sa nahitabong krimen.
Si Renante nagtuo nga buhok sa iyang anak nga si Ellah Joy ang mga hair-strands nga nakuha sa mga sakop sa Criminal Investigation and Detection Group (CIDG)-7 atol sa pag-implementar sa search warrant niadtong Abril 4, 2011 diha sa balay ni Santos sa barangay Inayagan, dakbayan sa Naga.
Nagkanayon usab kini nga ang LAN cord ug bato nga na-recover sa CIDG gikan sa balay ni Santos pareho kini sa na-recover uban sa patay’ng lawas sa iyang anak nga napalgan didto sa lungsod sa Barili.
Ang tipik sa motion sa kampo ni Pique nagkanayon nga “the stones are believed to be intended as sinker to hide the body, which fortunately did not reach the waters down the cliff,” matud pa sa mosyon sa mga Pique.
Samtang giklaro usab sa maong abogado nga ang paghupot pa lamang sa mga pornographic CD covers usa na ka kalapasan sa Anti-Child Pornography Act.
“The pornographic CD covers and assorted CD’s and waiver were seized on plain view, and in fact contraband under Anti-Child Pornography Law (RA 9775), which makes a person in possession of photographs of nude children liable, and the waiver being an agreement to such child pornography, easily discernable at the time of the search,” matud pa sa ilang mosyon.
Ang mga butang nga ipauli ngadto kang Santos human sa 15 ka adlaw gikan sa pagluwat sa order mao ang Mitsubishi Pajero nga gilalis pa sa kapolisan nga ipabilin, hair strands, LAN cord, Nintendo DS game cartridge, trapo, sex toys, pornographic CD covers ug nagkalain-laing CD, waiver ug nagkalain-laing IDs ug passports ug ang duha ka mga bato.
Niadtong Lunes si Santos miadto sa korte aron sa pagkuha sa mga butang nga wala malakip sa search warrant apan wala pa kini i-release tungod kay wala pa molapas ang 15 ka adlaw.
Apan matud ni Santos nga ang maong mga butang posibleng dili na niya mabawi tungod ka si Renante miduso man kini og motion for partial reconsideration.
Si Santos gihatagan og lima ka adlaw ug wala na kini extension sa pagtubag sa iyang komento sa motion for partial reconsideration nga giduso ni Pique. (BANATNEWS)