CEBU, Philippines - Naklaro ang kakulangon sa kabomberuhan sa pagtubag sa alarma sa sunog ilabi na kun kini mahitabo sa mga high-rise buildings ug daghang mga tawo ang kinahanglang luwason gikan sa pagkapaig.
Gawas pa niini, ang dugang mga pagbansay-bansay sa mga nagkadaiyang security personnel ug safety personnel sa nagkadaiyang mga establisamento.
Nunot niini makigtigom si Mayor Michael Rama sulod niining semanaha sa mga tag-iya sa mga dagkong buildings sa siyudad sa Sugbo aron awhagon sila nga mohulma og kaugalingong company fire brigade aron duna’y pasiunang makaresponde sa kaugalingon nilang mga tawo panahon sa emerhensya partikular na sa sunog.
Nagkanayon si Rama nga importante kaayo nga mopaubos og ensayo sa pag-rescue ang empleyado sa nagkadaiyang kompanya.
Naglaraw usab si Rama nga modangop sa konseho aron mahimoan og ordinansa nga magmando sa nagkadaiyang establisamento nga mobutang og daghang mga ekipo nga pang-alkontra sa sunog.
“Importante kaayo nga mo-invest pud og kaugalingon nila nga gadget ang mga High-rise buildings,” nagkanayon ang mayor. Sumala pa sa mayor nga ila karong gisusi ang kahimanan sa Cebu City Fire Department aron masuta kung unsa pa ang mga kulang niini.
Matud pa niya nga dunay P20 milyones nga gigahin ang siyudad sa maong departamento aron ipamalit og dugang mga kahimanan alang sa ilang mga operasyon.
Mohangyo usab si Rama sa ulohang buhatan sa Department of the Interior and Local Government (DILG) aron mahatagan og assistance ang City Fire Department nga hingpit nga makapalig-on sa ilang serbisyo.
Sa laing bahin, gidayeg ni Rama ang tanang mga bombero nga mingresponde sa nahitabong sunog sa Robinsons Place-Cebu sa milabay nga adlaw.
Sumala pa niya nga tulin ang pagresponde sa mga bombero bisan paman sa ka limitado sa ilang mga kahimanan ug nasalbar ang mga tawong nagkinahanglan og tabang.
Si Supt. Anderson Comar, ang city fire marshal sa pakighinabi sa Banat News mibutyag nga aduna gyuy kakulangon sa ilang mga ekipo sa pagkakaron partikular ang Self-Contain Breathing Apparatus (SCBA).
Ang SCBA maoy gamiton sa mga bombero pagsulod sa mga buildings nga napuot na sa bagang aso apan makahimo gihapon sila sa pagginhawa pinaagi niini. Ang bombero sa siyudad aduna ray 15 ka SCBA.
Gawas sa SCBA usa ra usab ang fire ladder sa dakbayan. Kini mao ang mga trak nga adunay taas kaayong mga hagdanan nga magamit pagpabakwit sa mga tawo gikan sa mga tag-as nga edipisyo.
Si Comar gikatakdang makigkita sa mayor aron hisgutan ang kabahin sa problema sa kakulangon sa mga ekipo apan siya nagkanayon nga mag-agad siya sa makitang assessment sa City Disaster Risk-Reduction Council sa ilang kakulangon. (EIM) - BANAT NEWS