CEBU, Philippines - Ang kagamhanan sa siyudad sa Sugbo midugang og 370 ka mga tinun-an alang sa programa nga summer job.
Nasayran nga 1,000 ka mga tinun-an karon ang nag-summer job sa nagkadaiyang departamento sa Cebu City Hall nga gibahin og duha ka grupo.
Katunga niini ang nagsugod na sa unang bahin karong buwana ug motrabaho sila sulod sa 20 ka adlaw.
Samtang ang 300 sa 370 ka student employees makadawat og tag P300 matag adlaw nga suweldo diin ang 40% niini naggikan sa Department of Labor and Employment dinhi sa rehiyon.
Gumikan sa pagtambayayong sa DOLE-7, makadaginot ang siyudad og P720,000 alang sa 300 ka mga tinun-an.
Kahinumdoman nga P6 million ang gigahin sa siyudad karong tuiga alang sa summer job program.
Tumong sa maong programa ang pagtabang sa mga kabatan-onan sa siyudad nga makapadayon sa ilang pag-eskwela. - BANAT NEWS