CEBU, Philippines - Duha ka tawo nga padulong sa pagsimba gitulis ug gipanunggab didto sa sitio Kinalumsan sa barangay Gun-ob, dakbayan sa Lapulapu dakbayan sa Lapulapu kagahapon sa alas 3:00 pasado sa kaadlawon.
Ang mga biktima mao sila si Crispolo Bastida, 38, ug Machuniero Bastida, 23 nga pulos molupyo sa maong dapit ug ang nagtulis kanila mao ang unom ka batan-ong mga lalaki diin duha niini ang nadakpan dayon sa kapolisan.
Ang nadakpan mao si Christopher Oyao, 22 ug Mark Joseph Oyao, 20 anyos nga taga sitio Lucata sa barangay Looc sa maong dakbayan.
Si PO2 John Carlo Jucotan nga nahinabi sa Banat News miingon nga paingon sa simbahan ang duha ka mga biktima alas 3:00 pasado sa kaadlawon dihang kalit lang kini gisugat sa unom ka mga batan-ong lalaki.
Dugang pa niya nga kalit lang gibunlot sa usa sa unom ka mga tawo si Crispolo ug gitionan ang liog og kutsilyo dayong deklarar nga tulis.
Gikuhaan sila sa ilang mga cellphone ug pitaka apan si Machuniero nga gibati og kalisang misuway unta og dagan apan gigukod sa usa sa mga tulisan ug gidunggab sa bukobuko.
Dali nga mibiya sa maong dapit ang unom ka tulisan ug gidala dayon sa tambalanan sa dakbayan sa Sugbo ang duha ka biktima.
Si PO2 Jucotan miingon nga sa joint operation sa mga sakop sa Special Weapon and Tactic (SWAT) ug homicide section sa kapolisan sa maong dakbayan ilang nadakpan ang duha ka tulisan ug ang ikatulo kinsa nakasibat, nailhan nga mao si Archie Lagnason taga Lapulapu ra usab.
Si Lagnason ug laing tulo pa ka wala hiilhing mga kauban maoy padayon pa nga gipangita sa kapokisan karon. - BANAT NEWS