Bayong-bayong gipusil patay sa silingan

CEBU, Philippines - Patay ang usa ka batan-ong lalaki nga gipusil sa ulo sa malditohon nga silingan niini didto sa sitio Soong, barangay Mactan, dakbayan sa Lapulapu sa miaging kaadlawon.

Ang biktima usa ka nag-edad og 17, ulitawo, ug   ang nagpusil mao si Romy Lariosa dela Serna, hingkod, nga nagpuyo sa maong dapit.

Si SPO3 Jesus Gemenia sa homicide section sa kapolisan sa maong dakbayan miingon nga ang biktima gikan pang mitan-aw og disco sa bispiras sa pista sa ilang dapit.

Dugang pa niya nga naglakaw kini sa maong dapit pauli sa ilang balay dihang ang suspetsado kalit lang mitumaw sa likod ug gipusil ang tingkoy sa biktima.

Matud pa ni SPO3 Gemenia nga human sa maong pagpamusil dali kaayong nakasibat pahilayo sa maong dapit ang suspetsado ug wala na madakpi sa follow up operation nga ilang gihimo.

Si SPO3 Gemenia miingon nga dili pa nila matataw ang hinungdan sa maong pagpamusil sanglit ang suspetsado nga giilang malditohon giingong wala ikaway sa biktima.  - BANAT NEWS