CEBU, Philippines - Nababha ang buko-buko ug kilid sa usa ka maguwang human kini unaya og tigbas sa iyang manghod gumikan sa panaglalis sa kuwarta didto sa barangay Calawisan, dakbayan sa Lapulapu sa miaging adlaw.
Ang biktima mao si Jonas Agnes, 24, ulitawo ug usa ka ahente og tambal nga taga Calawisan, samtang ang suspek mao ra usab ang iyang manghod nga si Anthony Agnes, 21, ulitawo, ug walay trabaho.
Si SPO1 Manolito Abellanosa ug PO2 John Carlo Jocutan sa Lapulapu City Police Station mibutyag sa Banat News nga sa sayo pa nagkalalis ang biktima ug ang suspetsado gumikan sa kuwarta.
Apan sa dihang miinit na ang lalis, wala na kaagwanta ang suspek ug dali kining mikuha og sundang sa ilang kusina ug sa way tihik-tihik, giligid og tigbas ang biktima.
Gumikan sa kahait sa sundang nga gigamit sa suspek, nahabha ang buko-buko, kilid ug uban pang bahin sa kalawasan sa biktima.
Gihatod dayon ngadto sa Lapulapu District Hospital ang biktima samtang ang suspetsado gipangita pa karon sa kapolisan human kini mosibat human sa hitabo.(WC) (BANAT NEWS)