CEBU, Philippines - Nadakpan ang usa ka bangkero sa hantak dihang siya ray nahibilin kay mikabad og panagan ang mga sugarol ug nabungkag ang tigbakay ug hantak kay gironda kini sa kapolisan didto sa barangay Cantuba-on lungsod sa Tabuelan niadtong Biyernes sa hapon.
Ang bugtong nadakpan sa kapolisan mao si Teotimo Parot Del Rosario Jr., 38, ulitawo ug molupyo sa barangay Cogon, lungsod sa Tuburan ug gitumbok nga bangkero sa hantakan.
Si PO3 Rommel Bancog, imbestigador sa Tabuelan Police Station mibutyag sa Banat News nga ang mga nakuha nga ebidensiya gikan sa dinakpan mao ang usa ka bato nga antogan, ring, flywood nga pustahan sa patay ug hari ingon man kwarta nga naglain-laing denominasyon nga tag P1, P5, P10 ug adunay tag P20 ug tag P50 nga mikabat ang tanan og P391.
Matud ni PO3 Bancog, nga usa ka concerned citizen ang nitawag sa ilang buhatan ug nagpahibawo kalabot sa tigbakay ug hantak sa maong lugar hinungdan nga ilang girespondihan pinaagi sa pagronda sa maong sugalan.
Apan dihang nagpaingon na sa maong lugar ang mga polis, nakabantay ang mga sugarol ug nag-iyahay sila og panagan ngadto sa kalibonan busa wala hidakpi.
Apan ang bangkero wala makadagan kay nahadlok pagbiya sa iyang antogan ug mga gipostang kuwarta nga diha sa iyang atubangan.
Kasamtangang nabalhug sa karsel ang suspek human kini pasakai og pormal nga kiha sa kapolisan. (BANAT NEWS)