Tiyo giluba sa pag-umangkon patay

CEBU, Philippines -  Giunay ug dunggab patay sa pag-umangkon ang kaugalingon niyang uyoan dihang nangahubog kini didto sa Sitio Lomboy, barangay Minolos lungsod sa Barili sa miaging gabii. Ang biktima mao si Marcilino Bayarcal, 52 , minyo , nga nagpuyo sa Sitio Estaca, barangay Minolos, samtang ang suspek mao ra ang iyang pag-umangkon nga si Marcelo Bayarcal, 26, minyo, nga nagpuyo sa Sitio Lomboy, Minolos.

Si SPO4 Eduardo Villaester sa Barili Police Station mibutyag sa Banat News nga ang biktima ug ang suspek nag-inom kauban sa ilang mga paryente sa   usa ka tindahan nga gipanag-iya sa igsoon sa biktima.

Sa tanto nilang panag-inum nagkalalis ang biktima ug ang suspek nga misangpot sa dakong away.

Ang suspek nga wala makaagwanta sa mga hait nga estorya sa biktima nga iyang uyoan, milanit kini sa gitangkil niyang kutsilyo ang   gihansak   makaduha   ug naigo ang biktima sa walang bukton ug sa ibabaw’ng bahin sa iyang walang dughan hinungdan nga wala na kini makaabot sa tambalanan nga buhi. Padayon pang gipangita sa kapolisan ang suspetsado kinsa misibat dayon human makapatay. (BANAT NEWS)