Magpale hapsay nga nagdumala sa opisina sa VGov

CEBU, Philippines - Hapsay ang padagan ni Bokal Agnes Magpale sa buhatan sa bise-gobernador diin siya ang kasamtangang nagdumala niini samtang nagmasakiton pa si Bise-Gob. Gregorio Sanchez, Jr.

Matud pa ni Magpale nga napatuman na ang mga palisiya nga una niyang gipatuman nga nakasugat og pagsupak sa pipila ka mga kawani sa buhatan ni Sanchez.

Usa niini ang pagdili sa pagpanigarilyo sulod sa buhatan subay sa ordinansa nga naaprobahan ug ang dili paglakaw sa kawani sa gawas sa Kapitolyo nga wala’y klarong pananghid.

Gihangyo ni Magpale ang mga kawani nga hatagan siya og higayun nga mopatuman sa mga lagda ug pagdumala sa buhatan hangtud nga mobalik na si Sanchez sa trabaho.

Ang aprobado nga vacation leave ni Sanchez mapupos karong Abril 30.

Samtang giseguro ni Magpale nga walay mawagtang sa kabtangan ni Sanchez sulod sa iyang buhatan.

Kini ang hinungdan nga iyang gipasirado ang lawak niini aron walay makasulod ni bisan kinsa sanglit siya ang pangitaan sa mawala nga butang.

Bisan si Magpale ang kasamtangang bise-gobernador apan wala kini mogamit sa buhatan ug nagpabilin sa iyang buhatan sa hunta probinsiyal. (BANATNEWS)