CEBU, Philippines - Tulo ka mga batan-on ang naangol, duha niini talandugon ang kahimtang human sila pamusila sa mga tawong nagmotorsiklo ug nagtaptap sa ilang nawong didto sa waitingshed sa Purok Abocado barangay Dumlog siyudad sa Toledo kagahapon sa alas 12:30 sa kaadlawon.
Ang mga biktima mao sila si Ronald Canada Lahaylahay, 21 anyos, ulitawo, Bernardo Quintadcan Dacuyan, 21, ulitawo ug John Ariel Gabanes, 19, ulitawo ug pulos mga molupyo sa nahisgutang lugar.
Samtang ang mga kriminal gihulagway nga mga batan-on nga nagsakay og motorsiklo ug wala maklaro ang dagway tungod kay nagtaptap og panyo dihang mipauwan og mga bala sa mga biktima.
Si PO2 Enerio Roxam sa Toledo City Police Station mibutyag sa Banat News si Lahaylahay nakaangkon og tulo ka samad pinusilan sa iyang tiyan, dughan ug tuong paa.
Samtang si Dacuyan naigo sa tiyan gihapon ug milapos ang bala sa walang bahin sa iyang lawas. Samtang si Gabanes swerte kay igo lang natapsingan sa bala sa iyang walang bahin sa sampot.
Subay sa inisyal nga imbistigasyon ang mga biktima nag-estambay sa waitingshed sa maong lugar dihang kalit nga miabot ang mga kriminal ug dayon mipauwan og mga bala ngadto sa mga biktima kinsa naglingkod niadtong tungora.
Human sa pagpamusil mipasirit dayon og padagan sa ilang motorsiklo ang mga kriminal ug mipahilayo sa maong lugar. Ang mga biktima daling gipanghatud ngadto sa Toledo City District Hospital apan gi-transfer dayun kini ngadto sa tambalanan sa dakbayan sa Sugbo.
Ang mga polis nga mirespondi sa maong hitabo nakapunit og pito ka kabhang sa bala sa kalibre .45 nga gikan sa armas sa mga kriminal
Ang kapolisan padayun pa sa ilang man hunt operation sa mga kriminal.
Samtang may duda sila nga kini may labot ang maong panghitabo sa magkaribal nga fraternity sa maong lugar. (BANATNEWS)