Zero waste hugot nga giimplimentar sa Naga

CEBU, Philippines - Higpit nga nagsunod sa Solid Waste Management Act ang dakbayan sa Naga ug higpit usab ang ilang pagpatuman sa zero waste pinaagi sa modernong pasilidad nga ilang gitukod diha sa Eco-Park sa barangay Pangdan.

Pinaagi sa Resource Recovery Management sa barangay Pangdan nga gisugdan niadto pang milabay’ng tuig wala nay basurang mausik sanglit kining tanan gi-recycle ug ang madugtang basura gihimong fertilizer ug biogas.

Pormal kagahapon nga gisirad-an ang open dumpsite sa barangay Bairan nunot sa kamanduan sa Department of Environment and Natural Resources (DENR).

Si Mayor Valdemar Chiong mibutyag nga sa pagpasirado sa maong dumpsite daghan silang gisunod nga mga rekisitos gikan sa DENR usa na niini ang pag-rehabilitate sa lugar.

Ang FDRCon Company, Inc., usa ka pribadong kompaniya mao nay mokolekta sa basura sa dakbayan ug maoy nagdumala sa RRM.

Si Fulgencio Revalde, Chairman sa FDRCon Company, Inc. mibutyag sa mga tigbalita kagahapon nga tumong nila ang “zero waste” diin makapreserbar kini sa kalikupan.

Gipasabot ni Revalde nga ang mga basura nga ilang makolekta ilaha kining iagi sa conveyor aron malahi ang mga food waste o mga pagka-on, recyclables, compost ug Refuse Derive Fuel (RDF).

Ang mga pagkaon ilahang ibutang ngadto sa tangke unya gikan sa tangke ibomba kini paingon ngadto sa digester aron ma-supply og bio-gas nga maoy gigamit aron pagpaandar sa ilang mga ekipo.

Duna usab silay lugar nga tapokan sa mga recyclable nga basura mabaligya sama sa lata, plastik ug puthaw. Samtang kadtong dili ma-recycle ug madugta gihimong alternatibong sugnod sa pabrika sa semento.

Gawas sa dakbayan sa Naga ang lungsod sa Minglanilla naglabay usab og basura diha sa RRM.

Matag adlaw ang FDR makakolekta kini og 50 ka toneladang basura diin 30 niini gikan sa Naga ug 20 gikan sa Minglanilla. Karong Abril 25, 2011 ang full operation sa FDR sa lungsod sa Minglanilla.

Ang Minglanilla mobayad og P1100 matag tonelada sa basura nga ilahang ilabay diha sa RRM ug 10 porsiyento niini masulod sa panudlanan sa Naga isip bahin sa abot.

Ang Naga usab magbayad og P750 matag tonelada sa basura nga ilahang ilabay. (BANATNEWS)