Seguridad sa Semana Santa pahugtan

CEBU, Philippines -  Nunot ning nagsingabot nga pag-obserbar sa Mahal nga Adlaw ang Cebu Coast Guard mas mopahugot pa sa pagbantay sa mga pasahero nga magdasok sa mga pantalan nga mamauli sa ilang tagsa-tagsa ka probinsiya.

Daling gipasabot ni Cebu Coast Guard Station Commander Rolando Punzalan dihang na-interview sa DyDD nga kini gitumong aron pagsiguro nga way overloading sa mga barko.

Gawas pa niini mao ang pagpaniid sa mga hulga sa seguridad ug magbutang og mga help desks diha sa pantalan aron moabag niadtong mga pasahero nga masaag o mangayo og dugang impormasyon sa ilang pagbiyahi ug pag-abot dinhi sa Sugbo.

Ang Cebu Coast Guard nakigtambayayong sa armadong kusog sa nasud, Cebu Port Authority, Philippine National Red Cross ug kapulisan aron sa pagpatuman og kahusay ug kalinaw sa pantalan.

Samtang gipahibalo ni Engr. Adolfo Quiroga, ang provincial planning and development coordinator sa Kapitolyo nga dili na sila mogamit og K-9 dogs pagsusi sa mga kontrabando tungod sa nahitabo sa Mactan Cebu International Airport.

Matud pa ni Quiroga napalpak ang mga iro diha sa MCIA pagsusi sa usa ka gidudahang pseudo-ephedrine nga sagol sa paghimo og shabu nga gidala sa duha ka mga Chinese nationals niadtong milabay’ng buwan.

Ang maong kemikal sagol diay sa pagpatubo sa mongos.

Gilikayan usab sa Kapitolyo nga masubli ang nahitabo sa Kapitolyo dihang napaakan ang usa ka batang babaye atol sa usa ka agri-show.

Nahuna-hunaan hinuon ni Capitol consultant Jose Ma. Gastardo dugangan nalang ang mga gwardiya sa South Bus Terminal inay mga iro. (BANAT NEWS)