Ecleo miduso og mosyon nga warrant i-defer

CEBU, Philippines -  Miduso sa iyang motion for reconsideration si Philippine Benevolent Missionaries (PBMA) Supreme Master ug Kongresista sa Dinagat Island nga si Ruben Ecleo Jr. aron dili ipa-kanselar sa korte ang iyang P1 milyon nga piyansa.

Si Fe Salvador, clerk of court sa Regional Trial Court (RTC) Branch 10 mibutyag nga ang abogado ni Ecleo nga si Orlando Salatandre miduso sa motion for reconsideration nga i-defer ang pag-isyu og warrant of arrest batok sa iyang kliyente tungod kay duna pa silay mosyon ngadto sa Korte Suprema ug Sandiganbayan nga kinahanglan pang iresolbar.

Si Salvador mibutyag nga si RTC Judge Soliver Peras sa Branch 10 ra maoy makadesisyon niini, si Peras mimando sa Criminal Investigation and Detection Group (CIDG) CARAGA nga maoy mo-serve sa warrant of arrest batok kang Ecleo ngadto sa Dinagat Island.

Ang CIDG-7 mi-serve sa warrant of arrest ni Ecleo sa iyang balay diha sa Banawa, dakbayan sa Sugbo niadtong milabay’ng semana apan wala kini.

Si Peras miluwat sa warrant of arrest batok kang Ecleo human ang Kongresista napakyas sa tulo ka higayon sa pagtambong sa bista sa iyang kaso. Si Ecleo gitugotan kaniadto sa korte nga makapiyansa tungod sa iyang sakit sa kasing-kasing.

Si Ecleo dunay duha ka warrant of arrest nga giluwatan ni Peras ug Sandiganbayan human siya makonbikto sa kasong graft o pagpangawkaw.

Samtang gipasalig sa kalihim sa PBMA sa dakbayan sa Lapulapu nga si Alberto Alforque nga di masusama niadtong 2002 nga diin adunay nakalas pag-serve sa warrant of arrest ni Ecleo tungod sa kasong parricide labot sa pagpatay sa asawa niini.

Si Alforque nagkanayon nga nahitabo ang kagubot kaniadto tungod usab sa di maayong pamaaging gihimo sa CIDG-7 maong adunay nakalas sa mga polis ug mga sakop sa PBMA.

Pabiling gibarugan sa ilang grupo nga inosente sa Ecleo sa mga pasangil batok niini sanglit alang kanila usa ka maayong tawo ug dili bayolente ang ilang lider. (BANAT NEWS)