Duha ka tulisang namusil sa kolektor nadakpan

CEBU, Philippines - Duha ka tulisan ang nasikop sa kapulisan sa dakbayan sa Naga human sila mitulis sa duha ka lending collector diha sa sudlonong bahin sa Seaside sa barangay North Poblacion niadtong Martes pasado alas-7 sa gabii.

Sila si Eric Abello, 23, nagpuyo sa nahisgutang lugar apan lumad nga taga Sta. Felomina Dipolog City ug Alex Cayum, 39, lumad nga taga Parang Cantillan Surigao del Sur ang gibalhog sa detention cell sa Naga City Police Station.

Ang duha maoy gitumbok nga mitulis sa mga biktimang sila si Gerald Quinikinto, 26, ug Apple Lanata nga mga kolektor sa usa ka lending company.

Matud pa sa mga biktima naglakaw sila sa nahisgutang lugar dihang kalit silang gipamusil sa mga gikatahapan. Si Quinikinto nahiagom og samad pinusilan sa tuong paa hinungdan nga natumba siya samtang mikaratil og dagan si Lanata ug daling misumbong sa mga molupyo sa maong dapit.

 Si Quinikinto daling gidala sa tambalanan samtang ang kapulisan human sa hitabo mipahigayon og hot pursuit operation ug pagka alas-10 sa gabii nadakpan sila si Abello ug Cayum.  - BANAT NEWS