CEBU, Philippines - Pormal nang gi-turn over ngadto ni Mayor Michael Rama ang bulawang bracelet nga gikustodiya sa kapulisan human gi-prenda sa usa ka ahensya diha sa barangay Suba niadtong miaging semana ni Lorelie Sambilon nga taga barangay Suba.
Samtang ang bana ni Sambilon nadakpan sa mga sakop sa San Nicolas Police Station niadtong Biyernes sa gabii samtang giingong nanuyop.
Apan sa wala pa kini giuli sa mayor gikuha una sa ilang balay si Sambilon sa mga sakop sa Theft and Robbery Section (TRS) ug sila maoy nagkuyog ngadto kang Rama uban kang Sr. Supt. Melvin Ramon Buenafe.
Nakahukom ang kapulisan nga i-turnover sa mayor human mimandu nga iyang ipa-imbestigar sa Police Coordinating and Advisory Council (PCAC) si Sr. Insp. Bonifacio Garciano, hepe sa TRS gumikan kay matud sa mayor wala siya magtuo nga apil pa ba diay sa trabaho sa polis ang paglukat sa alahas ngadto sa pawnshop unya kaugalingong kwarta pa gyud sa polis ang gibayad sa interest.
Gitahasan sa mayor paghimo’g imbestigasyon mao si Retired Maj. Romeo Cordova sa Civil Security Unit ug presiding officer sa PCAC sa Cebu City Hall. Ang maong bulawang bracelet nakit-an ilawom sa mga used clothing nga hinatag sa usa ka negosyante sa miaging semana ug giprenda kini sa maong pawnshop og P50 mil.
Apan nataymingan usab nga dunay gilungkab nga alahas diha sa barangay Pardo nga nagkantidad og kapin usa ka milyon maong gikuha sa kapolisan ang maong alahas diha sa giprendahan ni Sambilon.
Sa pagkakarun upat na ka tawong mi-claim nga sila maoy tag-iya sa maong alahas apan napakyas ang upat pagpakita og saktong dokumento nga ilaha ang maong bracelet.
Si Sr. Insp. Noel Lomente, hepe sa San Nicolas Police Station mibutyag nga nadakpan nila si Orlando Sambilon (bana ni Lorelie) nga nagsuyop og shabu diha sa barangay Suba uban sa laing duha ka lalaki.
Si Lomente miingon nga nakagawas ra hinuon si Orlando human gipyansahan nianang adlaw’ng Lunes.
Miawhag usab ang mayor ngadto sa kapulisan nga ipadayon ang imbestigasyon aron matino kung kinsa gyud ang tag-iya sa bracelet. - Sanden Anadia/EIM (BANAT NEWS)