CEBU, Philippines - Ang negosyo sa airline industry gihulagway naapektahan karong mga panahona apan bisan paman niini in-demand gihapon ang mga piloto, cabin crew ug mga mekaniko dinhi sa nasud ug sa gawas sa nasud.
Si Congressional Chairman on Higher Education and Technical Education ug Aurora Province Lone District Congressman Juan Edgardo Angara (anak ni Sen. Edgardo Angara) mibutyag nga naapektahan ang airline industry sa gubat sa Middle East.
Si Angara nga maoy pinasidunggang dinapit sa graduation rites sa Philippine State College of Aeronautics ( PHILSCA) – Mactan Benito Ebuen Air Base Campus nagkanayon nga taas ang panginahanglan sa mga trabahante sa airline industry.
Gidasig ni Angara ang maong graduates nga dili usikan ang oportunidad nga makatrabaho sa airline industry nunot niining panginahanglan.
Gipanghinaut ni Angara sa tagdumala sa PHILSCA nga si Dr. Bernard Ramirez, ang College President nga palambuon pa og maayo ang ilang kurikulom ilabi na sa aspetong teknikal nga maoy yawe sa kalampusan sa mga tinun-an atol sa ilang pagpanarbaho.
Si Ramirez sa iyang bahin mipadayag nga ilang ipaubos sa dugang training ang ilang mga bag-ong migradwar sa Aeronautical Engineering isip preparasyon sa ilang board exam karong tuiga.
Matud pa ni Ramirez buot niyang ang batch karon nga mokuha sa eksaminasyon molabaw pa sa topnotcher sa 2009 ug 2010 board examination nga produkto ra gihapon sa maong tunghaan.
Samtang si PHILSCA-MBEAB Campus Director Dr. Nonadel Soriano mipadayag nga andam na ang ilang mga bag-ong gradwado alang sa maong board exam ug ipadala kini ngadto sa ilang ulohang buhatan sa PHILSCA alang sa pagbansaybansay sa dili pa ang gitakdang pasulit. - BANAT NEWS