CEBU, Philippines - Padayon nga gitun-an ni Gob. Gwendolyn Garcia ug mga opisyales sa Vicente Sotto Memorial Medical Center ang pagpalambo sa Carcar District Hospital ingon man ang Oslob District Hospital sa habagatang bahin sa lalawigan sa Sugbu.
Sumala pa sa director sa Vicente Sotto Memorial Medical Center nga Dr. Gerardo Aquino Jr. nga tuyo ni Garcia sa pagpadali sa pagpalambo ug pagpa-moderno sa Carcar District Hospital aron ma-decongest o maminusan ang gidaghanon sa mga pasyente sa VSMMC.
Buot sa gobernador nga ang mga pasyente gikan sa habagatan dili na kinahanglang dad-on pa diha sa VSMMC kung kompleto na ug may kaugalingong modernong ekipo ang Carcar District Hospital.
Lakip usab sa ilang nasabutan uban ni Garcia ug ubang mga opisyal sa probinsiya mao ang pagpabutang og laboratoryo, klinika ug botika sa maong hospital. Nagtuo ang mga opisyal nga kung moderno ug kompleto na ang ekipo sa Carcar District Hospital mamenusan na ang pagdala sa mga pasyente diha sa VSMMC gikan sa habagatan ug moluag na ang naulahi.
Samtang gipatawag ni Garcia sila si Boljoon Mayor Teresita Celis ug Oslob Mayor Ronald Guaren , Santander Vice Mayor Wilson Wenceslao ingon man Samboan Mayor Raymond Joseph Calderon niadtong Martes aron hisgutan unsay angayang buhaton sa Oslob District Hospital. Atol sa pagpatawag gipatambong usab ang hepe sa Integrated Provincial Health Office nga si Dr. Cristina Giango diin gituki ang angayang buhaton sa pagpalambo sa operasyon sa Oslob District Hospital.
Usa sa plano ni Garcia mao ang pagbutang sa maong hospital og pasilidad sama sa x-ray machine ug ultra-sound nga sa pagkakaron kinahanglan pang sa siyudad sa Sugbu dad-on ang pasyente. - BANAT NEWS