Suliran sa drainage sulbaron

CEBU, Philippines - Ang kahimtang sa mga kanal sa dakbayan sa Mandaue maoy nag-unang suliran sa kagamhanan sa matag higayon nga kusog ang ulan busa kasagaran sa mga molupyo manglayas gikan sa ilang mga balay.

Busa si Mayor Jonas Cortes miluwat og Executive Order Number 10 nga nagmando sa pag-umol sa Committee on Drainage System and Flood Control Management sa dakbayan.

Sa maong EO 10   ang maong komite pangulohan ni manlalaban James Abadia gikan sa buhatan sa mayor sa maong dakbayan, Architect Florentino Nimor Jr. officer-in-charge city planning and development, Engr. Gregorio Omo, sa city engineering office, Engr. Oscar Rodriguez consultant on urban planning, Engr. Antonio Sanchez consultant on infrastructure ug uban pa.

Lakip usab nga sakop sa maong komitiba ang representante gikan sa private sector   sama kang Engr. Geminiano Vasquez ug Danilo Jaque nga maoy consultant on solid waste sa dakbayan.

Ang maong grupo maoy tahasan sa pagpaniid sa kahimtang sa mga kanal sa dakbayan ug ang paghatag og tukmang lakang alang sa paghatag og kasulbaran sa maong suliran sa dakbayan.

Kahinumdoman nga dihang mibundak ang kusog kaayong ulan niadtong Enero 25 niining tuiga , nasinatian ang grabeng baha sa dakbayan nga nakaabli sa hunahuna ni Mayor Cortes sa paghawan sa mga illegal nga estraktura sa kasapaan ug sa paglimpiyo niini.  - BANAT NEWS