Mariñas gihasi sa iyang bise mayor

CEBU, Philippines - Gihulagway ni Barili Mayor Teresito Mariñas nga usa lang ka political harassment ang tuyo sa kasong gipasaka batok kaniya sa iyang bise mayor ug mga konsehal sa buhatan sa Ombudsman Visayas karung bag-o.

Si Mayor Mariñas gipasakaan og kasong grave abuse of authority ug negligence of duty ni Bise Mayor Marlon Garcia ug mga konsehal gumikan kuno sa iyang kapakyas sa pagpirma ug pag-release sa travelling allowance sa ilang pagtambong sa Philippine Councilors League (PCL) sa milabay’ng bulan.

Apan matud ni Mariñas sa iyang pamahayag sa Banat News ug sa Bantay Radyo pinaagi sa telepono nga way igong basihanan ang maong mga reklamo ug wala siya mahulga niini tungod kay tataw kaayo usa lamang kini ka paghasol kaniya.

“This is pure and simple political harassment intended to humiliate and degrade the duly elected mayor of the town”, dugang asoy ni Mayor Mariñas.

Gihulagway hinoon sa mayor ang iyang bise mayor ug mga kaalyadong konsehal niini nga nagmaniobra karun og bisan unsang dili maayong paagi aron siya ma- suspenso ug makalingkod kini kun mabakanti ang iyang posisyon nga gisalig kaniya sa kinabag-ang mga molupyo sa ilang lungsod niadtong milabay’ng eleksiyon.

Mipadayag og kaandam si Mariñas sa pag-atubang sa maong reklamo nga gisang-at batok kaniya sa buhatan sa Ombudsman aron mahibaw-an kun si kinsa kanila ang nagsulti sa tinuod.

Nasayran nga nagbawos bawos nalang pagsang-at og reklamo ang mayor ug ang bise mayor sa maong lungsod sa buhatan sa Ombudsman diin si Mayor Marinas adunay unang reklamo nga gipasaka batok kang Garcia   tungod sa pasangil niini nga gikasab-an siya ug gi-insulto niini dihang mitambong siya sa sesyon sa konseho niadtong bulan sa Agosto sa 2010 bahin sa gisugyot niya nga pagpalit og CCTV camera alang sa lungsod.

Ang maong reklamo bag-ohay lang gi-upgrade sa Ombudsman Visayas alang sa pormal nga kaso ug gihatagan og napulo ka adlaw ang kampo ni Garcia pagtubag niini.

Gipaabot usab nga si Mayor Mariñas ug Bise Mayor Garcia maoy magbangga sa 2013 eleksiyon gumikan niining nagusbat nilang relasyon.  - BANAT NEWS