Mga terminal ug pantalan guwardiyado

CEBU, Philippines - Higpit nga bantayan sa kapolisan ang mga pantalan ug mga terminal sa mga sakyanan sa tibuok lalawigan atol sa pagsaulog sa Semana Santa.

Sa South Bus Terminal gituohan nga magdasok ang mga pasahero sa maong lugar sumala ni Retired Colonel Cesar Veloso nga maoy security consultant sa kagamhanan sa lalawigan. 

Hinuon wala makatino si Veloso sa gidaghanon sa mga polis nga ilang idugang sa pagbantay sa maong lugar kauban ang mga K-9 dog .

Nunot niini si Veloso hugtanong mipahimangno sa mga pasahero sa South Bus Terminal nga magbantay usab sa ilang mga butang aron dili mabiktima sa mga kawatan nga mopahimulos sa maong adlaw.

Sa laing bahin si Engineer Ernesto Boltron nga maoy safety officer sa MARINA 7 miingon nga higpit usab nilang ipatuman ang siguridad sa mga pantalan sa Sugbo sugod sa sunod semana.

Magbutang sila og mga CCTV camera sa mga strategic area sa pantalan aron mamonitor ang lihok sa mga tawo sa sulod sa maong lugar.

Dugang K-9 dog, PPA police ang ilang ipakatap nga maoy moabag sa pagbantay sa mga private security guard nga nagbantay sa pier area.

Samtang sa North Bus Terminal nakaalerto usab ang mga kapolisan nga idestino sa maong dapit.

Si Sozimo Jumao-as nga maoy manager sa maong terminal miawhag sa mga pasahero nga magbantay sa ilang kaugalingon aron dili mabiktima sa mga kawatan ug mangingilad.

Samtang si Sr. Supt. Patrocinio Comendador ang hepe sa kapolisan sa lalawigan sa Sugbo mibutyag nga andam na kaayo ang kapolisan sa lalawigan sa pagbantay sa ilang tagsatagsa ka hurisdiksyon atol sa Semana Santa.

Matud pa ni Comendador kargahan nila og 300 ka kapolisan ang mga lugar sa lalawigan nga duawonon sa mga turista. Romeo T. Limpangog, Sanden Anadia ug Lesley Caminade Vestil/WC (BANAT NEWS)