Bagtak sa polis nagisi

CEBU, Philippines - Nagisi ang bagtak sa usa ka polis human kini masabod sa usa ka drayber sa sikad-sikad sa dalan F. Paras barangay Poblacion lungsod sa Barili sa miaging buntag.

Ang biktima nailhan nga si PO1 Ronnie Premolan Guzman, nadestino sa Barili Police samtang ang iyang na-igo mao ang trisikad  drayber nga si Arnel Tesaluna, 22.

Sa pakighinabi sa Banat News ni PO1 Pablito Caadlawon, ang tag-iya sa motorsiklo nga gimaneho ni Guzman, kini mibutyag nga nianang pagkabuntag adunay surprise inspection sa ilang buhatan.

Apan nakalimtan ni Guzman ang iyang kalo hinungdan nga mihulam siya og motor ni Caadlawon aron dalikyaton pag-uli ang iyang kalo sa ilang balay.

Apan dihang paatubang na siya sa ilang buhatan si Guzman giingong mi-overtake og traysikad apan iyang natapsingan si Tesaluna nga nagmaneho sa traysikad.

Natumba si Guzman ug naigo ang iyang bagtak sa foot rest sa motor nga iyang gisakyan hinungdan sa pagka-gisi niini.

Gihatod dayon siya sa Barili District Hospital apan gibalhin kini sa tambalanan sa syudad sa Sugbo.

Samtang ang drayber sa traysikad kinsa nakaangkon usab og bun-og sa lawas wala na prisoha kay wala man mokiha si Guzman kaniya.  - BANAT NEWS