Kinsay nagtug-an sa tinuod drug suspect o mga polis?

CEBU, Philippines -  Mopahigayon og imbestigasyon ang bag-ong director sa kapulisan sa probinsya nga si Sr. Supt. Patrocinio Comendador sa mga sakop sa Provincial Intelligence Branch (PIB) nga gipasanginlan miharas ug nangulata sa ilang dinakpang bigtime drug pusher didto sa dakbayan sa Danao niadtong miaging semana. Gawas sa pagpangharas, si Comendador mosusi usab kung gitarong ba ang pag-imbentaryo sa kuwarta nga nalakip sa nasakmit gikan sa posesyon sa suspetsado.

Si Insp. Julius Ompad sa Provincial Investigation and Detective Management Branch (PIDMB) maoy gitahasan sa pagpahigayon og imbestigasyon.

Usa ka Jerry Tito Bataluna, 48, kinsa nadakpan sa PIB niadtong Sabado sa gabii diha sa sitio Juan Luna sa barangay Looc sa dakbayan sa Danao mipasangil nga giharas, gikulata ug gipatid-patiran siya sa midakop kaniyang mga sakop sa PIB hangtud nga gidala siya sa Consolacion Police Station ug gi-detain.

Matud ni Bataluna nga nagpa-load siya sa iyang cellphone niadtong higayona sa usa ka tindahan sa nahisgutang lugar sa dihang kalit siyang gidakop sa mga awtoridad ug giharas.

“Mura ko’g baboy gipasok sa sakyanan, gitaptapan nila akong mata unya gitamak-tamakan. Gisukmag pa gyud ko kay kuno misukol ko,” asoy ni Bataluna kinsa mipakita sa iyang mga bun-og sa kalawasan lakip na sa iyang ‘black eye’ walang mata.

Si Supt. Rodolfo Albotra hepe sa PIB nagkanayon nga misukol gyud si Bataluna sa dihang gidakop sa mga awtoridad.

“Gahi na siya nga pusher but we dare to file a case kung unsa gani we will answer him,” matud pa ni Albotra.

Si Bataluna midugang nga duna siya’y kwarta nga dili mominos P50 mil nga kita sa iyang internet café’ nga gikuha sa mga awtoridad apan ang gibutang sa spot report sa PIB P3,200 ra. Si Bataluna anaa sa priority list sa PIB kinsa nakuhaan og mga pakete sa gidudahang ang sulod shabu nga mokantidad og P65 mil atol sa buy-bust operation niadtong Sabado nga gipangulohan ni Sr. Insp. Mark Gifter Sucalit.

Nakuha sa iyang posesyon mao ang upat ka medium pack, duha ka dakong pakete, pito ka paketeng pulos dunay gidudahang sulod nga shabu, usa ka P1,000 buy-bust money, P3,200 nga kwarta, usa ka cellphone, duha ka tin foil ug usa ka pitaka nga dunay I.D’s.

Ang ilegal nga drugas kasamtangan giduso ngadto sa PNP Crime Laboratory-7 diha sa Camp Sotero Cabahug alang sa eksaminasyon. Si Comendador miingon nga ilang susihon ang maong pasangil aron sutaon kun wala bay lapses nga nahimo ang kapulisan. “This is serious allegation I’ll make sure walay hukos-pokus nga nahitabo as I assumed office,” matud niya.

    Kalapasan sa section 5, 11, ug 12 sa R.A 9165 lakip na ang direct assault and resisting arrest ang giandam nga kasong ilang ipasaka ngadto sa Provincial Prosecutors Office batok kang Bataluna. (BANAT NEWS)