Mekaniko nagtesting sa motor nalamba, patay

CEBU, Philippines -  Patay ang usa ka mekaniko human malamba ang motorsiklo niining gi-ayo nga paingon na unta niyang ihatud sa tag-iya didto sa national highway sa Lower Cambuntan, barangay Bolinawan, siyudad sa Carcar sa miaging hapon.

Ang biktima mao si Edilberto Canad Kihoy Jr, 31, minyo ug usa ka mekaniko ug nagpuyo sa Sityo Kaipilan barangay Poblacion-1 sa maong siyudad. Si SPO1 Reynaldo Fuentes sa Carcar City Police mibutyag sa Banat News nga ang biktima nag-ayo sa usa ka motorsiklo nga Honda XL-125 nga adunay plaka nga GA-7224 nga gipanag-iya sa usa ka Gualberto Alegado, hingkod ug nagpuyo sa maong lugar.

Dihang naayo na, gitestingan dayon kini pagpadagan sa biktima kay iya nang ihatud sa pinuy-anan sa tag-iya niini, apan pag-abot sa maong lugar aksidenting nadakin-as ang maong motorsiklo tungod usab sa kakusog sa pagpadagan niini ug nag-una ang ulo sa biktima nga walay helmet nga mitugpa sa sementadong karsada.

Daling gihatod sa mga estambay sa maong lugar ang biktima ngadto sa Carcar District Hospital apan gideklarar kini sa mga doctor nga dead on arrival tungod sa seryusong kadaut nga naangkon sa ulo niini. (WC)(BANAT NEWS)