CEBU, Philippines - Patay ang usa ka 33-anyos nga negosyanteng ginang ug swerteng nakalingkawas ang iyang bana ug anak nga batang babaye sa pagpang-ambush nga nahitabo sa Bonifacio St., barangay Poblacion siyudad sa Danao niadtong Lunes sa alas 8:00 sa gabii.
Ang biktima nga patay human makaangkon og daghang samad pinusilan sa lawas mao si Jean Manto, 33, nga nagpuyo sa maong lugar.
Kauban sa biktima ang iyang bana nga si Joseph Manto, ug ang anak niining batang babaye nga naglingkod sulod sa sakyanan. Ang pamilya nanag-iya og pribadong eskuylahan sa maong dakbayan.
Samtang ang mga mamumuno gihulagway lang sa mga nakasaksi nga duha ka lalaking nagsakay og motorsiklo ang mipusil sa mga biktima.
Subay sa inisyal nga imbestigasyon nila ni SPO3 Nilo Pantojan Jr., ug mga kaubanan nga maoy miresponde sa crime scene ang mga biktima sakay sa ilang sports utility vehicle gikan nga nanuroy ug paingon na untang mamauli niadtong higayuna.
Dihang miabot na sa ilang balay ang mga biktima nanaog ang bana nga si Joseph aron patingugon ang doorbell sa ilang balay.
Apan dihang nakakanaug na si Joseph kalit nga miduol ang mga mamumuno nga gituohang diha nang daan sa lugar nag-atang sa mga biktima ug mipusil sa biktima nga diha maglingkod sa frontseat nga bahin makadaghang higayon.
Human sa pagpamusil abtik nga misakay og balik ang mamumuno sa nagpaabot nga kauban sa motor ug misibat pahilayo. Ang biktima daling gihatud sa Danao City District Hospital apan gideklarar sa mga doktor nga dead on arrival.
Samtang ang mga polis nga miresponde naka-recover og tulo ka kabhang sa bala sa kalibre .45 nga pistola nga gituohang gikan sa armas sa mamumuno. (EIM) (BANAT NEWS)