CEBU, Philippines - Gipaabot nga hugopan sa mga langyaw ug lokal nga turista ang kasaulogan sa Kadaugan sa Mactan karong Abril 27 niining tuiga nga pagahimoon sa Mactan Shrine sa barangay Mactan.
Sumala sa naandan na, masaksihan ang linawas nga pagpasundayag sa gubat sa Mactan nila ni Datu Lapulapu ug Ferdinand Magellan ug mga sakop niini sa maong higayon.
Si Konsehal Harry Don Radaza nga maoy chairman sa turismo sa konseho sa maong dakbayan nga nahinabi sa Banat News miingon nga ilang gipalapdan ang kalihokan alang sa paghatag og dugang kamabulokon sa maong makasaysayanong kasaulogan sa dakbayan.
Matud pa niya nga ang pagsaulog sa Kadaugan sa Mactan nga naandang ipahigayon matag Abril 27 matag tuig, ilang gidugangan pa og mga adlaw hangtod Abril 30 karong tuiga sa paghatag og dugang kadasig sa tanang mobisita sa dakbayan.
Dugang pa niya nga sa Abril 30 maoy pagpahigayon sa labing unang indigay sa Rampada nga pagasalmotan sa nagkadaiyang contingent sa street dancing ug Samba Parade 2011.
Si Radaza midugang nga masaksihan sa maong adlaw ang live band free concert, Volkswagen Car Show, Car audio bass contest, tricycle contest ug gourmet walk with resorts and hotel ug face book photo contest diin dagkong ganting salapi ang madawat sa mga mananaug.. - (BANAT NEWS)