Lalaking natagak sa dagat niadtong Huwebes milutaw dugta na

CEBU, Philippines - Napalgan nga nagsugod og kadugta ang patay’ng lawas sa usa ka tawo sa daplin sa kadagatan sa Sac 2 sa barangay Mactan, dakbayan sa Lapulapu alas 8 pasado ang takna kagahapon sa buntag.

Ang maong patay’ng lawas nga napalgan giila ni SPO1 Roderict Islet nga mao si Jerry Jumao-as Diaz, 36, walay trabaho nga lumad nga taga Medellin, Cebu ug kasamtangang nagpuyo sa barangay Labogon, dakbayan sa Mandaue.

Si Islet miingon nga ang maong patay’ng lawas giila sa iyang ig-agaw nga si Fortunato Casiban nga kasamtangang nagpuyo sa barangay Labogon sa dakbayan sa Mandaue.

Sa alegasyon sa ig-agaw ni Casiban, adunay laing lima ka tawong kauban si Diaz nga nanagat niadtong Huwebes sa buntag apan sumala pa sa mga kauban ni Diaz nahagbong ang naulahi sa dagat sa maong dapit.

Gisulayan pa unta nila kini sa pagpangita apan napakyas sila nga makaplagan si Diaz.

Gitug-an ni Casiban sa kapolisan nga nagbaton og sakit nga patol iyang ig-agaw ug maoy ilang pagtuo nga giatake kini sa iyang sakit nga maoy hinungdan sa pagkahagbong niini sa dagat ug namatay.

Aron pagklaro kung unsay gikamatyan ni Diaz ang kapolisan mirekomendar nga ipa-awtopsiya ang patay’ng lawas niini aron mapapas ang mga pagduda. (BANAT NEWS)