CEBU, Philippines - Gipakusgan karon sa kagamhanan sa dakbayan sa Mandaue ang pagpangaspalto sa kadalanan lakip na ang mga barangay road agi og pagpahimulos samtang ting-init pa.
Si Engineer Marivic Cabigas sa city engineering office nga nahinabi sa Banat News miingon nga ilang gipahimuslan ang kahigayonan sa maayong panahon aron katapakan gayud ang tanang mga libaong sa karsada.
Matud pa niya ang makabalda sa maong gimbuhaton mao ang panahon sa tinguwan sanglit dili na maklaro ang mga lungag sa karsada kun mapuno kini sa tubig.
Matud pa ni Cabigas nga dugay na silang nagpaminaw sa mulo sa katawhan sa barangay gumikan sa mga libaungon nilang karsada, busa agig tubag niini, adlaw ug sa gabii wala silay puas sa pagsuroysuroy sa kadalanan aron pagpanapak sa mga gubaong bahin niini.
Samtang si Engineer Antonio Sanchez nga kanhi city engineer sa Mandaue nga nagserbisyo isip consultant ni Mayor Jonas Cortes miingon nga lakip karon sa ilang gipaningkamotan nga mahuman mao ang extention nga dalan sa G. Ouano Avenue sa barangay Ibabao nga molagbas sa dalan M. C. Briones Avenue.
Matud pa niya nga gipaspasan nila karon nga mahuman na ang maong proyekto nga nalangan tungod sa usa ka tag-iya sa luna nga mao na lay wala kabayri.
Dugang pa niya nga ang maong dalan maoy magsilbing alternatibong kaagian sa mga sakyanan gikan sa Marcelo Fernan Bridge paingon sa dakbayan sa Sugbo. (BANAT NEWS)