Kanhi Phil. Marine naghikog

CEBU, Philippines - Usa ka kanhi sakop sa Philippine Marines (PM) patay na nga nagbitay sa sulod sa iyang lawak didto sa barangay Dos Poblacion, lungsod sa Tuburan kagahapon sa udto.

Ang naghikog nailhan nga si Charlito Cinco Collamar, 46, usa ka negosyante og lamas ug kanhi sakop sa PM.

Sa pakighinabi sa Banat News ni SPO3 Carlo Canseko, sa Tuburan Police Station, kini mibutyag nga sa wala pa si Collamar maghikog giingong ang asawa niini ug anak mibiya sa ilang balay kay atimanon ang ilang neogsyo nga lamas sa merkado sa maong lungsod.

Matud pa ni Canseko nga nianang pagka-alas 12:00 sa udto nanguli na ang asawa ug anak ni Collamar apan natingala sila tungod kay sirado ang atubangang bahin sa ilang balay.

Busa gisugo sa inahan ang ilang 6-anyos nga anak nga lalaki nga adto lang moagi sa bintana sa ilang balay.

Apan nakurat ang anak dihang nakita niini ang iyang amahan nga nagluhod, samtang may hikot nga pisi ang liog niini ug wala na maglihok.

Gibutyag ni Canseko nga mipahigayon pa sila og lawom nga imbestigasyon sa hinungdan sa paghikog ni Collamar. (BANAT NEWS)