2 gipareglaha'g pusil naangol

CEBU, Philippines - Nalandig sa tambalanan ang duha ka tawo human kini pamusila sa wala hiilhing lalaki samtang mitambong og disko didto sa sitio Riverside, barangay Lawaan III, dakbayan sa Talisay kagahapon sa kaadlawon.

Ang mga biktima giila sa mga polis nga sila si Rommel Olimba, hingkod ang panuigon nga taga dalan Echavez, dakbayan sa Sugbo ug Junnel Layson, hingkod usab, nga taga R. Padilla, dakbayan usab sa Sugbo.

Si PO1 Jundave David sa Talisay City Police Station sa pakighinabi niini sa Banat News kagahapon nagkanayon nga usa sa mga biktima nakaangkon og samad pinusilan sa ulo ug ang usa nakaangkon og samad pinusilan sa lawas.

Apan matud ni David nga wala nila masuta kung kinsa sa duha ang nakaangkon og samad pinusilan sa ulo tungod kay pag-abot nila sa lugar nadala na ngadto sa Talisay City District Hospital, ug tungod sa ilang talandugong kahimtang gibalhin dayon sila ngadto sa Vicente Sotto Memorial Medical Center.

Base sa imbestigasyon sa kapolisan nga niadtong Sabado, bisperas sa piyesta sa maong sitio ug adunay gipahigayong disko.

Sa wala pa mahitabo ang pagpamusil, usa ka ginganlan og Gilbert Espinosa, 21, taga barangay Langtad, dakbayan sa Naga gisumbag sa usa ka wala hiilhing lalaki.

Ang ig-agaw niining si Richard Espinosa, 26 taga barangay Tunghaan kinsa nakakita sa hitabo milaban kang Gilbert.

Unya may usa ka wala hiilhing lalaki ang miduol ug misumbag usab kang Richard apan wala kini makaigo.

Laing wala hiilhing lalaki ang miduol nga may armas de fuego mikomprontase kang Richard ug milanit kini sa iyang   armas hinungdan nga nahitabo ang linayogay sa duha.

 Apan nakabuhi ang nahisgutang lalaki ug buot na untang pusilon niini si Richard apan sila si Olimba ug Layson miduol aron motabang kang Richard, hinungdan nga silang duha na hinuon ang gipamusil.

Human sa maong hitabo ang kriminal daling miikyas ug wala na kini hidakpi sa kapolisan. (BANAT NEWS)