3 nag-inom gipamatay

CEBU, Philippines - Patay diha-diha ang tulo ka tawo nga naglakip sa usa ka giingong sakop sa barangay intelligence network (BIN), samtang usa ang samaran human sila pamusila sa wala hiilhing mamumuno sulod sa Limbaga KTV sa N. Bacalso Ave., barangay Mambaling ning dakbayan sa Sugbo kagahapon sa alas 3:00 sa kaadlawon.

Ang mga biktima mao sila si Ramil Bayolas, 30, usa ka stay-in worker sa Cebu Quality Electroplating ug lumad nga molupyo sa Sindangan, Zamboanga del Norte; Gilbert Caballes Sabejon, 25, sakop sa BIN, usa ka habal-habal driver nga taga barangay Buhisan, dakbayan sa Sugbo ug laing usa ka wala mailhing lalaki nga nagsul-ob og checkered nga orange polo, maong pants, nagbukot og puti nga face towel sa iyang ulo, nga gibana-bana nga nagpangidaron og 20 anyos, nga may gitas-ong 5’4.

Samtang ang samdan mao si Gely Ubos Laag, 28, usa ka construction worker , nga taga barangay Lipata, lungsod sa Minglanilla.

Sa inisyal nga imbestigasyton sa kapolisan nasayran nga ang mga biktima, pulos mga kustomer sa nahisgutang KTV bar kinsa nagkalingaw og inom, ug nagkanta-kanta uban sa pipila usab ka laing mga kustomer atol sa maong hitabo.

Apan samtang nalingaw ang mga biktima, sulod sa maong KTV, kalit lang  mipatim-aw ang usa ka wala hiilhing lalaki nga nagsul-ob og pula nga t-shirt ug itom nga kawo, og kalit lang mipaulan og mga bala sa iyang armas de fuego ngadto sa mga biktima.

Tungod sa kakalit sa hitabo, nautingkay ang mga customer sa bar ug nag-iyahay og panagan sa gawas, samtang ang uban nanghapa sa sawog sa maong imnanan..

Dihang mihunong na ang buto-buto, maoy nakita sa mga saksi nga mibay-ad nga wala nay kinabuhi ug naglunang sa ilang dugo ang mga biktima, ang usa nga nabinlan og kinabuhi maoy gihatod dayon ngadto sa Cebu City Medical Center.

Usa sa tulo nga nakalas kinsa wala pa hiilhi sa pagsuwat ning balita nakaangkon og samad pinusilan sa iyang dughan, samtang si Bayolas, nasabak gihapon sa ibabaw sa iyang walang dughan, si Sabejon nasabak sa tuong bahin sa dughan, ug si Laag nga naigo sa tiyan ug tuhod, maoy nahibiling buhi, apan anaa sa kritikal nga kahimtang.

Matud pa usa sa mga nakasaksi nga si Sacarias Ugbenada, nga human sa hitabo, nakakita siya og upat ka tawo gikan sa bar nga nahitaboan nga nagdali sa pagpanglakaw ug nagbuwag og direksyon sa ilang padulngan.

Sa pakighinabi sa The Freeman/Banat News ni PO3 Wetzel Berry sa Cebu City Police Office, mitug-an nga hangtod karon nagpabiling blanko pa sila ug wala pay lead nga maggiya kanila sa pagsulbad sa maong krimen, ug sa pagtumbok sa mga kriminal. (WC) (BANAT NEWS)