CEBU, Philippines - Nagtingkagol sa Talisay City detention cell ang usa ka giingong pusher og shabu human kini masikop sa kapolisan atol sa gipahigayong buy bust operation didto sa barangay Tabunok, dakbayan sa Talisay sa miaging gabii.
Ang suspetsado mao si Ramil Racaza alyas “Ramil” ug “Baki”, residente sa maong dapit.
Naimbargo sa mga polis gikan kang Racaza ang duha ka paketeng shabu ug ang P500 nga buy bust money.
Ang kapolisan sa dakbayan sa Talisay ubos sa koordinasyon sa Philippine Drug Enforcement Agency (PDEA)-7 mipahigayon og joint operation sa Cebu Provincial Police Office (CPPO) batok sa suspetsado human sila makadawat og report bahin sa ilegal nga pagpamaligya ni Racaza og ginadiling drugas.
Si Inspector Hugo Rio Ipong, PO3 Rey Bucao, PO3 Benedicto Lasque, PO2 Roy Lofranco ug PO2 Jason Delcampo maoy misikop kang Racaza.
Si Del Campo maoy gihimong poseur buyer sa grupo.
Si Bucao nga nahinabi sa Banat News kagahapon nagkanayon nga si Racaza gawas nga giingong mamaligya og shabu, usa usab kini ka adik ug niadtong tuig 2007 nasikop nila kini tungod sa paghupot og mga drug paraphernalia. (BANAT NEWS)